Home Blog

ຈັດການແທ້​! ຮ້ານອາຫານທີ່ເປີດກາຍໂມງ ລະເມີດຄຳສັ່ງ

0

ເຈົ້າໜ້າທີ່ໃຊ້ມາດຕະການເດັດຂາດຕໍ່ 2 ຮ້ານ ທີ່ລະເມີດ ແຈ້ງການ 018/ສພກ.ນວ

ຕາມການລາຍງານ ຂອງປ້ອງກັນຄວາມສະຫງົບນຄອນຫຼວງວຽງຈັນ ໃຫ້ຮູ້ວ່າ: ໃນຄືນວັນທີ 1 ສິງຫາ 2021, ເຈົ້າໜ້າທີ່ຕໍາຫຼວດພະແນກທ່ອງທ່ຽວ ຫ້ອງສັນຕິບານ ກອງບັນຊາການ ປກສ ນະຄອນຫຼວງວຽງຈັນ ນໍາໂດຍ ພັທ ອຸດອນ ຈັນທະວົງ ຮອງຫົວໜ້າຫ້ອງສັນຕິບານ ປກສ ນວ ໄດ້ສົມທົບກັບກອງພັນປ້ອງກັນເຄື່ອນທີ່ ແລະ ພາກສ່ວນທີ່ກ່ຽວຂ້ອງ ລົງກວດກາພົບເຫັນ ຮ້ານ ຊີຊີ ບຣາ ຢູ່ເຂດສາມແຍກຫຼັກ 1 ບ້ານຫາຍໂສກ ເມືອງຈັນທະບູລີ ແລະ ຮ້ານອາຫານ ດົງຫອຍ ຢູ່ເຂດເສັ້ນທາງຕັດໃໝ່ລະຫວ່າງ ບ້ານພະຂາວ ຫາ ບ້ານ ຄໍາຮຸ່ງ ເມືອງໄຊທານີ ເປີດໃຫ້ໃຊ້ບໍລິການເກີນໂມງທີ່ກໍານົດໄວ້ ( 22:00 ໂມງ ) ແລະ ບໍລິການເຄື່ອງດື່ມທີ່ມີທາດເຫຼົ້າ ໂດຍລະເມີດຕໍ່ແຈ້ງການເລກທີ 018/ສພກ.ນວ, ລົງວັນທີ 20 ກໍລະກົດ 2021 ວ່າດ້ວຍການເພີ່ມທະວີມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຢູ່ນະຄອນຫຼວງວຽງຈັນ.

ພັທ ອຸດອນ ຈັນທະວົງ ຮອງຫົວໜ້າຫ້ອງສັນຕິບານ ປກສ ນວ ໃຫ້ຮູ້ວ່າ: ຕໍ່ກັບຮ້ານ ຊີຊີ ບຣາ ແລະ ຮ້ານອາຫານ ດົງຫອຍ ເຈົ້າໜ້າທີ່ ໄດ້ປະຕິບັດມາດຕະການຕໍ່ຜູ້ລະເມີດ ຕາມແຈ້ງການເລກທີ 018/ສພກ.ນວ, ລົງວັນທີ 20 ກໍລະກົດ 2021 ທີ່ລະບຸໄວ້ໃນຂໍ້ 3 ວ່າ: ບຸກຄົນ ຫຼື ນິຕິບຸກຄົນໃດ ຫາກລະເມີດມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ທີ່ລັດຖະບານ, ຄະນະສະເພາະກິດ, ກະຊວງ-ອົງການ ຂັ້ນສູນກາງ, ນະຄອນຫຼວງວຽງຈັນ ວາງອອກ ແມ່ນຈະຖືກປັບໄໝ ຢ່າງເຂັ້ມງວດ ແລະ ເດັດຂາດ. ດັ່ງນີ້: ບຸກຄົນທີ່ລະເມີດ ໃຫ້ປັບໄໝ ແຕ່ 500.000-3.000.000 ກີບ ຕໍ່ຄົນ ແລະ ຕໍ່ຄັ້ງ; ສ່ວນນິຕິບຸກຄົນທີ່ລະເມີດ ໃຫ້ປັບໄໝ ແຕ່ 5.000.000-10.000.000 ກີບ ຕໍ່ນິຕິບຸກຄົນ ແລະ ຕໍ່ຄັ້ງ.

ເພື່ອເປັນການປ້ອງກັນ, ຄວບຄຸມ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ກອງບັນຊາການ ປກສ ນະຄອນຫຼວງວຽງຈັນ, ຈິ່ງຮຽກຮ້ອງມາຍັງບັນດາຮ້ານອາຫານ-ກິນດື່ມ ແລະ ຮ້ານບັນເທີງ ໃຫ້ປະຕິບັດຕາມແຈ້ງການເລກທີ 018/ສພກ.ນວ, ລົງວັນທີ 20 ກໍລະກົດ 2021 ວາງອອກຢ່າງເຂັ້ມງວດ ເພື່ອບໍ່ໃຫ້ພະຍາດສືບຕໍ່ແຜ່ລະບາດ ແລະ ເຮັດໃຫ້ການດໍາລົງຊີວິດຂອງພໍ່ແມ່ປະຊາຊົນກັບຄືນສູ່ສະພາວະປົກກະຕິໂດຍໄວ.

ເຄິ່ງປີ ເມືອງສີໂຄດຕະບອງ ມີຜູ້ເສຍຊີວິດ ຈາກອຸບັດຕິເຫດ 9 ຄົນ

0

6 ເດືອນຕົ້ນປີ 2021 ເມືອງສີໂຄດຕະບອງ ມີຜູ້ເສຍຊີວິດ 9 ຄົນ ຍ້ອນອຸບັດຕິເຫດ

ຕາມການລາຍງານ ຂອງປ້ອງກັນຄວາມສະຫງົບ ນະຄອນຫຼວງວຽງຈັນ ໃຫ້ຮູ້ວ່າ: ພັຕ ບຸນຄົງ ພັດທະລັງສີ ຮອງຫົວໜ້າກອງຮ້ອຍຕໍາຫຼວດຈະລາຈອນ ປກສ ເມືອງສີໂຄດຕະບອງ ໄດ້ໃຫ້ສໍາພາດຕໍ່ນັກຂ່າວ ປກສ ນວ ໃນວັນທີ 02 ສິງຫາ 2021 ວ່າ: ໃນໄລຍະ 6 ເດືອນຕົ້ນປີ 2021 ທົ່ວເມືອງສີໂຄດຕະບອງ ມີອຸບັດຕິເຫດເກີດຂຶ້ນທັງໝົດ 69 ເລື່ອງ, ມີຄົນເສຍຊີວິດ 9 ຄົນ, ຍິງ 3 ຄົນ, ຄົນໄດ້ຮັບບາດເຈັບ 108 ຄົນ, ຍິງ 24 ຄົນ, ພາຫະນະເປ່ເພທັງໝົດ 132 ຄັນ, ລົດໃຫຍ່ 58 ຄັນ, ລົດຈັກ 74 ຄັນ; ທຽບໃສ່ 6 ເດືອນຕົ້ນປີ 2020 ມີອຸບັດຕິເຫດເພີ່ມຂຶ້ນ 5 ເລື່ອງ, ແຕ່ມີຄົນເສຍຊີວິດຫຼຸດລົງ 2 ຄົນ.

ສາເຫດເກີດອຸບັດຕິເຫດໄລຍະ 6 ເດືອນຕົ້ນປີ 2021 ຄັ້ງນີ້ມີຢູ່ 3 ສາເຫດຄື: 1. ດື່ມສິ່ງມຶນເມົາແລ້ວຂັບຂີ່ພາຫະນະ, ໃຊ້ຄວາມໄວເກີນກໍານົດ, ປ່ຽນທິດທາງການສັນຈອນກະທັນຫັນ; 2. ສະພາບເສັ້ນທາງບໍ່ເອື້ອອໍານວຍຄວາມສະດວກ ບາງເສັ້ນທາງເປ້ເພ, ເປັນບວກເປັນຂຸມ, ບໍ່ມີໄຟເຍືອງທາງ ແລະ 3. ສະພາບເຕັກຂອງລົດບາງຄັນບໍ່ໄດ້ມາດຕະຖານ, ບໍ່ມີໄຟສັນຍານ, ບໍ່ມີໄຟໜ້າ-ຫຼັງຂອງລົດ.

ຕໍ່ກັບສະພາບດັ່ງກ່າວ ເຈົ້າໜ້າທີ່ຕໍາຫຼວດຈະລາຈອນ ປກສ ເມືອງສີໂຄດຕະບອງ ໄດ້ເອົາໃຈໃສ່ແກ້ໄຂ ໂດຍໄດ້ວາງກໍາລັງລົງປະຈໍາປ້ອມ, ຈຸດ 3 ແຍກ 4 ແຍກ ແລະ ຈຸດຕ່າງໆທີ່ການຈັນຈອນແອອັດ-ສັບສົນ ເພື່ອອໍານວຍຄວາມສະດວກ ໃຫ້ຜູ້ໃຊ້ລົດໃຊ້ຖະໜົນສັນຈອນໄປ-ມາໃຫ້ມີຄວາມປອດໄພ ເພື່ອຫຼີກລ່ຽງການເກີດອຸບັດຕິເຫດ ແລະ ຮຽກຮ້ອງໃຫ້ບັນດານັກຂັບຂີ່ ຈົ່ງປະຕິບັດກົດລະບຽບຈະລາຈອນຢ່າງເຂັ້ມງວດ, ເວລາຂັບຂີ່ລົດຈັກ ໃຫ້ໃສ່ໝວກກັນກະທົບທຸກຄັ້ງ, ຜູ້ຂັບຂີ່ລົດໃຫຍ່ ກໍໃຫ້ຮັດສາຍນິລະໄພ, ບໍ່ຄວນດື່ມສິ່ງມຶນເມົາແລ້ວຂັບຂີ່ລົດ ເພື່ອປ້ອງກັນການເກີດອຸບັດຕິເຫດ.

6 ເດືອນທ້າຍປີ 2021 ກອງຮ້ອຍຕໍາຫຼວດຈະລາຈອນ ປກສ ເມືອງສີໂຄດຕະບອງ ຈະເລັ່ງສືບຕໍ່ລົງລະບາຍການສັນຈອນຕາມຈຸດທີ່ມີຄວາມອແອັດ-ສັບສົນ; ເພີ່ມຄວາມເອົາໃຈໃສ່ໃນການປະຕິບັດໜ້າທີ່ໃຫ້ເຂັ້ມງວດດ້ານຫຼັກການຂັບຂີ່; ເອົາໃຈໃສ່ລົງໂຄສະນາຕາມຈຸດຕ່າງໆທີ່ມີຄວາມແອອັດສັບສົນ ເພື່ອໃຫ້ນັກຂັບຂີ່ເຂັ້ມງວດໃນການປະຕິບັດກົດລະບຽບການສັນຈອນ.

4 ສິງຫາ ມີຜູ້ຕິດເຊື້ອໃໝ່ ຊຸມຊົນ 7 ຄົນ, ນຳເຂົ້າ 283 ຄົນ

0

ອີງຕາມການລາຍງານ ຂອງຄະນະສະເພາະກິດປະຈຳວັນທີ 4 ສິງຫາ 2021:
ຜູ້ຕິດເຊື້ອໃໝ່ມື້ນີ້ລວມ
290 ໃນນັ້ນແມ່ນຕິດເຊື້ອຊຸມຊົນ 7 ກໍລະນີ ແລະ ຕິດເຊື້ອຈາກແຮງງານນໍາເຂົ້າ 283 ກໍລະນີ.

ເຊິ່ງຕິດເຊື້ອໃນຊຸມຊົນ 7 ຄົນ ຄື:

  • ນະຕອນຫຼວງວຽງຈັນ 1 ຄົນ (ເປັນຜູ້ສຳຜັດໃກ້ຊິດກັບພະນັກງານທີ່ເຮັດວຽກຢູ່ສູນຈຳກັດບໍລິເວນ)
  • ໄຊຍະບູລີ 3 ຄົນ
  • ສະຫວັັນນະເຂດ 2 ຄົນ
  • ຈຳປາສັກ 1 ຄົນ

ສຳລັບ ກໍລະນີນໍາເຂົ້າ ມີ 283 ຄົນ ຈາກ ນະຄອນຫຼວງ 37 ຄົນ, ຄຳມ່ວນ 6 ຄົນ, ສະຫວັນນະເຂດ 92 ຄົນ, ສາລະວັນ 17 ຄົນ ແລະ ຈຳປາສັກ 131 ຄົນ ເຊິ່ງກວດພົບຈາກແຮງງານລາວ ທີ່ກັບມາແຕ່ປະເທດເພື່ອນບ້ານ ເຂົ້າຕາມຈຸດຜ່ານແດນສາກົນ.

ມາຮອດມື້ນີ້ ພວກເຮົາມີຕົວເລກຜູ້ຕິດເຊື້ອສະສົມທັງໝົດ 7,305 ຄົນ, ຄົນເຈັບເສຍຊີວິດສະສົມ 7 ຄົນ (ໃໝ່ 0) ແລະ ກໍາລັງປິ່ນປົວ ທັງໝົດ 3,620 ຄົນ.

ລາວ – ສະວິດ ສືບຕໍ່ເພີ່ມທະວີການຮ່ວມມື

0

ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ພ້ອມ​ຄະ​ນະ ​ໄດ້​ພົບ​ປະ​ສອງ​ຝ່າຍ ກັບ ທ່ານ ອິ​ກນາ​ຊີ​ໂອ​ ກາດສີດ​ສ (Ignazio Cassis) ​ຮອງ​ປະ​ທາ​ນາ​ທິ​ບໍ​ດີ ລັດ​ຖະ​ມົນ​ຕີ​​ກະ​ຊວງການ​ຕ່າງ​ປະ​ເທດ ແຫ່ງ ສະ​ມາ​ພັນ​ທະ​ລັດ ສະ​ວິດ ພ້ອມດ້ວຍຄະນະ ​ໃນ​ວັນ​ທີ 3 ສິງ​ຫາ 2021 ທີ່​ກະ​ຊວງ​ການ​ຕ່າງ​ປະ​ເທດ, ໃນໂອກາດເດີນທາງມາຢ້ຽມຢາມ ສປປ ລາວ ຢ່າງເປັນທາງການ ໃນວັນທີ 3-4 ສິງຫາ 2021.

ໃນ​ການ​ພົບ​ປະ​ຄັ້ງ​ນີ້, ສອງຝ່າຍໄດ້​ທົບ​ທວນ​ຄືນ ແລະ ຕີ​ລາ​ຄາ​ສູງ​ ຕໍ່​ການ​ພົວ​ພັນ​ຮ່ວມ​ມື​ໃນ​ຂອບ​ສອງ​ຝ່າຍ ແລະ ຫຼາຍ​ຝ່າຍ ໃນ​ໄລ​ຍະ​ຜ່ານ​ມາ ໂດຍ​ໄດ້​ຮັບ​ການ​ຮັດ​ແໜ້ນ ແລະ ເສີມ​ຂະ​ຫຍາຍ​ຢ່າງ​ຕໍ່​ເນື່ອງ ບົນ​ພື້ນ​ຖານ​ຄວາມ​ເຂົ້າ​ອົກ​ເຂົ້າ​ໃຈ, ການ​ຊ່ວຍ​ເຫຼືອ​ຊຶ່ງ​ກັນ ແລະ ກັນ, ການ​ພົວ​ພັນ​ມິດ​ຕະ​ພາບ ແລະ ການ​ຮ່ວມ​ມື​ອັນ​ເປັນ​ມູນ​ເຊື້ອ​ມາ​ແຕ່​ດົນ​ນານ ນັບຕັ້ງແຕ່ໄດ້ຮັບການສ້າງຕັ້ງສາຍພົວພັນການທູດນໍາກັນໃນປີ 1963.

ໃນ​ໂອ​ກາດ​ດຽວ​ກັນ​, ທ່ານ ສະ​ເຫຼີມ​ໄຊ ກົມ​ມະ​ສິດ ຍັງ​ໄດ້​ຕາງ​ໜ້າ​ໃຫ້​ລັດ​ຖະ​ບານ ແຫ່ງ ສ​ປ​ປ ລາວ ສະ​ແດງ​ຄວາມຂອບ​ໃຈ​ຢ່າງ​ຈິງ​ໃຈ ຕໍ່​ການ​ຊ່ວຍ​ເຫຼືອອັ​ນ​ລ້ຳ​ຄ່າ​ຂອງ​ລັດ​ຖະ​ບານ​ ແລະ ປະ​ຊາ​ຊົນ ສະ​ວິດ ທີ່​ມີ​ຕໍ່ ສ​ປ​ປ ລາວ ຕະ​ຫຼອດໄລ​ຍະ​ຜ່ານ​ມາ ໂດຍ​ສະ​ເພາະແມ່ນ​ໃນລະຫວ່າງປີ 2006-2021 ທີ່ ສະ​ວິດ ໄດ້​ໃຫ້ການຊ່ວຍເຫຼືອ ແກ່ ສປປ ລາວ ລວມມູນຄ່າທັງໝົດປະມານ 224 ລ້ານສະວິດຝຣັ່ງ ຊຶ່ງກວມເອົາ​ຫຼ​າຍ​ຂະ​ແໜງ​ການ​ທັງໃນ​ຂອບ​ສອງ​ຝ່າຍ ແລະ ຫຼາຍ​ຝ່າຍ ​ເຊັ່ນ: ຂະແໜງກະ​ສິ​ກຳ, ສາ​ທາ​ລະ​ນະ​ສຸກ, ການສຶກ​ສາ, ການ​ຄ້າ-ການ​ລົງ​ທຶນ, ການ​ທ່ອງ​ທ່ຽວ, ສະ​ຖິ​ຕິ, ພະ​ລັງ​ງານ​ໄຟ​ຟ້າ, ການ​ປົກ​ຄອງ, ການເກັບກູ້ລະເບີດ UXO, ໄປສະນີ, ໂທລະຄົມມະນາຄົມ ແລະ ການສື່ສານ, ຊັບພະຍາກອນທໍາມະຊາດ ແລະ ສິ່ງ​ແວດ​ລ້ອມ (ການ​ປ່ຽນ​ແປງ​ຂອງ​ດິນ​ຟ້າ​ອາ​ກາດ), ໂຍ​ທາທິການ ແລະ ​ມະ​ນຸດ​ສະ​ທຳ. ປັດ​ຈຸ​ບັນ, ສະ​ວິດ ໄດ້​ສຸມ​ໃສ່​ການ​ຊ່ວຍ​ເຫຼືອໃນຂະແໜງການບຸລິມະສິດຂອງການພັດທະນາຢູ່ ສປປ ລາວ ເຊັ່ນ: ຂົງເຂດກະສິກຳ ແລະ ຄ້ຳປະກັນສະບຽງອາຫານ; ການປົກຄອງ ແລະ ການມີສ່ວນຮ່ວມຂອງປະຊາຊົນ; ອາຊີວະສຶກສາ, ການຈ້າງງານ ແລະ ການ​ພັດ​ທະ​ນາ​ສີ​ມື​ແຮງ​ງານ.

ນອກນັ້ນ, ສະ​ວິດ ຍັງ​ໄ​ດ້ປະ​ກອບ​ສ່ວນການຊ່ວຍເຫຼືອດ້ານສະບຽງອາຫານໃຫ້ ແຮງງານລາວທີ່ສູນຈຳກັດບໍລິເວນພະຍາດໂຄວິດ-19 ຢູ່ນະຄອນຫຼວງວຽງຈັນ ແລະ ແຂວງອື່ນໆ, ວັກຊິນຕ້ານ ໂຄວິດ-19 ຜ່ານໂຄງການ Covax Facility Programme ແລະ ຫຼາຍໆ​ໂຄງ​ການ​ທີ່ສະໜັບສະໜູນວຽກງານການປ້ອງກັນ ແລະ ຄວບ​ຄຸມ​ພະ​ຍາດ​ໂຄວິດ-19. ​ພິ​ເສດ, ໃນ​ໂອ​ກາດ​ຢ້ຽມ​ຢາມ​ຄັ້ງ​ນີ້ ຈະ​ມີ​ພິ​ທີ​ລົງ​ນາມ​ໃນ​ຂອບ​ການ​ຊ່ວຍ​ເຫຼືອ​ໃໝ່ແກ່ ສ​ປ​ປ ລາວ ໃນສັນ​ຍາວ່າ​ດ້ວຍ​ການຊ່ວຍ​ເຫຼືອດ້ານວິຊາການ, ວັດທະນະທໍາ, ການເງິນ, ເສດຖະກິດ ແລະ ການຊ່ວຍເຫຼືອດ້ານມະນຸດສະທໍາ.

ໃນໂອກາດດັ່ງກ່າວ, ສອງຝ່າຍຍັງໄດ້ພ້ອມ​ກັນ​ຕີ​ລາ​ຄາ​ສູງ​ ຕໍ່​ການຮ່ວມມືໃນຂອບອາຊຽນ ຊຶ່ງໃນ​ໄລ​ຍະ​ຜ່ານ​ມາ ​ສະ​ວິດ ໄດ້ມີການເຄື່ອນໄຫວຢ່າງຕັ້ງໜ້າໃນການເສີມຂະຫຍາຍການພົວພັນກັບບັນດາປະເທດລຸ່ມແມ່ນໍ້າຂອງ ແລະ ພາກພື້ນແມ່ນໍ້າຂອງ ແລະ ອາຊຽນ ໃນຖານະເປັນຄູ່ຮ່ວມມືພັດທະນາ, ອັນພົ້ນເດັ່ນແມ່ນການຄ້າ ອາຊຽນ-ສະ​ວິດ ໃນປີ 2020 ມີມູນ​ຄ່າ​ລວມ​ 25,86 ຕື້ໂດລາ, ການລົງທຶນຈາກ ສະ​ວິດ ຢູ່ ອາຊຽນ ມີທ່າ​ອ່ຽງ​ເພີ່ມ​ຂຶ້ນ ຈາກ​ປີ 2018 ມີມູນຄ່າ 0,71 ຕື້ໂດລາ ​ແລະ ​ໃນ​ປີ 2019 ແມ່ນມີມູນຄ່າ​ເພີ່ມ​ຂຶ້ນ​ເປັນ 3,53 ຕື້ໂດລາ.

ຂໍ້ມູນ: ປະຊາຊົນ

ຈັບກຸມແກ້ງສໍ້ໂກງຊັບ 3 ຄົນ ມູນຄ່າເສຍຫາຍເກືອບ 400 ລ້ານ ກີບ

0

ກັກຕົວກຸ່ມແກ້ງສໍ້ໂກງຊັບພົນລະເມືອງ 3 ຄົນ, ຜົນເສຍຫາຍເກືອບ 400 ລ້ານກີບ

ຕາມການລາຍງານ ຂອງປົກກັນຄວາມສະຫົງບນະຄອນຫຼວງວຽງຈັນ ໃຫ້ຮູ້ວ່າ: ໃນວັນທີ 31 ມີນາ 2021, ເຈົ້າໜ້າທີ່ພະແນກຕໍາຫຼວດ ປກສ ເມືອງຈັນທະບູລີ ນວໄດ້ກັກຕົວກຸ່ມແກ້ງສໍ້ໂກງຊັບພົນລະເມືອງຈໍານວນ 3 ຄົນຄື: ນາງ ວັນນະພອນ ອາຍຸ 43 ປີ,ອາຊີບຄ້າຂາຍ ຢູ່ບ້ານທາດຫຼວງກາງ ເມືອງໄຊເສດຖາ ນວ, ທ້າວ ພອນສະຫວັນ ອາຍຸ 60 ປີ,ອາຊີບ ຄ້າຂາຍ ຢູ່ບ້ານໄຊສົມບູນ ເມືອງໄຊທານີ ນວ ແລະ ທ້າວ ວົງກົດ ອາຍຸ 60 ປີ, ອາຊີບ ກໍາມະກອນ ຢູ່ບ້ານນາໄຮ່ ເມືອງຫາດຊາດຟອງ ນວ. ສ້າງຜົນເສຍຫາຍທັງໝົດ 390.000.000 ກີບ ມາດໍາເນີນຄະດີຕາມຂັ້ນຕອນຂອງກົດໝາຍ.

ພັທ ພອນໃຈ ພາມຸງຄຸນ ຮອງຫົວໜ້າກອງບັນຊາການ ປກສ ເມືອງຈັນທະລີ ນວ ໃຫ້ຮູ້ວ່າ: ໃນຕົ້ນເດືອນ ມີນາ 2021, ພາຍຫຼັງໄດ້ຮັບແຈ້ງຄວາມຈາກຜູ້ເສຍຫາຍ ວ່າ: ຖືກສໍ້ໂກ້ງຊັບ. ຫຼັງຈາກນັ້ນ ເຈົ້າໜ້າທີ່ຕໍາຫຼວດຈຶ່ງໄດ້ທໍາການ ເກັບກຳຂໍ້ມູນຫຼັກຖານຢ່າງລະອຽດຊັດເຈນຈຶ່ງໄດ້ຮຽກຕົວນາງ ວັນນະພອນ ມາສອບສວນ. ຜ່ານການສອບສວນຕົວຈິງຜູ້ກ່ຽວໄດ້ຮັບສາລະພາບວ່າ: ຕົນເອງໄດ້ສ້າງຂໍ້ມູນເທັດຂຶ້ນມາແທ້ ໂດຍອ້າງວ່າ: ຈະມີເງິນກອງທຶນຊ່ວຍເຫຼືອຈາກຕ່າງປະເທດເພື່ອມາຊ່ວຍເຫຼືອປະຊາຊົນທຸກຍາກເຂົ້າມາເປັນຈໍານວນຫຼວງຫຼາຍ, ຖ້າຫາຜູ້ໃດຢາກໄດ້ແມ່ນ ໃຫ້ມາລົງທະບຽບຜູ້ລະ 500.000 ກີບ ແລ້ວຈະໄດ້ເງິນຊ່ວຍເຫຼືອ ໂດຍການໂອນເງິນເຂົ້າບັນຊີ 50.000 ໂດລາຕໍ່ຄົນ. ເມື່ອປຸກລະດົມຫຼາຍຄັ້ງ ຈຶ່ງເຮັດໃຫ້ຜູ້ເສຍຫາຍຫຼົງເຊື່ອຈຶ່ງໄດ້ເອົາຊັບສິນຂອງຕົນໄປຂາຍແລ້ວນໍາເອົາເງິນຈໍານວນດັ່ງກ່າວໄປລົງທະບຽບ ແລະ ໄດ້ລົງທະບຽນຕົກເປັນຈໍານວນ 780 ຄັ້ງ, ລວມເປັນເງິນທັງໝົດ 390.000.000 ກີບ.

ນອກນັ້ນ ນາງ ວັນນະພອນ ໄດ້ຮັບສາລະພາບຕື່ມອີກວ່າ: ການຕົວະຍົວະຫຼອກລວງຄັ້ງນີ້ ບໍ່ແມ່ນຕົນເອງເຮັດພຽງຄົນດຽວຍັງມີຜູ້ຮ່ວມຂະບວນການອີກ ຄື: ທ້າວ ວົງກົດ ແລະ ທ້າວ ພອນສະຫວັນ ທີ່ໄດ້ຮ່ວມກັນປືກສາຫາລືວາງແຜນ. ສະນັ້ນ, ເຈົ້າໜ້າທີ່ຈຶ່ງໄດ້ຮຽກຕົວ ທ້າວ ວົງກົດ ແລະ ທ້າວ ພອນສະຫວັນ ເຂົ້າມາສອບສວນ ແລະ ພວກກ່ຽວທັງສອງໄດ້ຮັບສາລະພາບວ່າ: ໄດ້ຮ່ວມກັນຕົວະຍົວະຫຼອກລວງຄັ້ງນີ້ແທ້, ສ່ວນເງິນທັງໝົດທີ່ໄດ້ມານັ້ນ ພວກກ່ຽວທັງ 3 ຄົນ, ໄດ້ແບ່ງປັນກັນເອົາໄປໃຊ້ຈ່າຍ ແລະ ເຈົ້າໜ້າທີ່ເກັບກູ້ຄືນມາໄດ້ຄື: ເງິນໂດລາ 1300 ໂດລາ, ເງິນກີບ 10 ລ້ານກີບ, ຄໍາ 4 ບາດເຄິ່ງ ພ້ອມດ້ວຍລົດຕູ້ 1 ຄັນ ແລະ ໄດ້ມອບຄືນໃຫ້ຜູ້ເສຍຫາຍ.

ຮອງນາຍົກລັດຖະມົນຕີ ລົງຢ້ຽມຢາມເຂດການຂຸດຄົ້ນແຮ່ຄຳ

0

ຕາມ Lao National Radio ລາຍງານ: ຮອງນາຍົກລັດຖະມົນຕີຢ້ຽມຢາມເຂດການຂຸດຄົ້ນແຮ່ຄຳ ຂອງບໍລິສັດທຽນຈີນຫົວຄານ ບໍ່ແຮ່ລາວ ຈຳກັດ ໃນວັນທີ 2 ສີງຫາ 2021 ນີ້ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ລັດຖະມົນຕີກະຊວງແຜນການ ແລະ ການລົງທຶນ ພ້ອມດ້ວຍການນຳ ຂອງແຂວງ ແລະ ກະຊວງກ່ຽວຂ້ອງ ໄດ້ຢ້ຽມຢາມເຂດການຂຸດຄົ້ນແຮ່ຄຳ ຂອງບໍລິສັດທຽນຈີນຫົວຄານບໍ່ແຮ່ລາວຈຳກັດ ເຊີ່ງຕັ້ງຢູ່ເຂດບ້ານຜາປົ່ນເມືອງປາກອູູ ໂດຍໄດ້ຮັບການຕ້ອນຮັບຈາກ ຄະນະອຳນວຍການບລິສັດ ແລະພະນັກງານພາຍໃນ, ໂອກາດນີ້ ຕາງໜ້າຄະນະອຳນວຍການບລິສັດ ໄດ້ລາຍງານສະພາບການດຳເນີນການຂອງບໍລິສັດວ່າ:

ເລີ່ມແຕ່ປີ 2011 ບໍລິສັດທຽນຈີນຫົວຄານ ບໍ່ແຮ່ລາວ ຈຳກັດ ໄດ້ດຳເນີນການສຳຫຼວດ ແລະ ໄດ້ຮັບການເຊັນສັນຍາ ອານຸມັດຂຸດຄົ້ນບໍ່ໍ່ແຮ່ ແລະປຸງແຕ່ງແຮ່ຄຳ ຢູ່ເຂດບ້ານຜາປົ່ນ ເມືອງປາກອູແຂວງຫຼວງພະບາງ ໃນປີ 2015, ມາເຖີງເດືອນພະຈິກປີ 2016 ການກໍສ້າງສີ່ງອຳນວຍຄວາມສະດວກ ໄດ້ສໍາເລັດສົມບູນ ແລະໄດ້ເລີ້ມຕົ້ນເຂົ້າສູ່ ຂັ້ນຕອນທົດລອງການຜະລິດ, ມາຮອດທ້າຍປີ 2020 ບໍລິສັດໄດ້ລົງທືນເຂົ້າ ໃນການສ້າງທັງໝົດ 72 ລ້ານໂດລາສະຫະລັດ, ທັງນຳໃຊ້ພະນັກງານທັງໝົດ 434 ຄົນ, ໃນນັ້ນ ເປັນພະນັກງານຄົນຈີນ 180 ຄົນ, ນອກນັ້ນ ເປັນຄົນລາວ, ສະເພາະ 6 ເດືອນຕົ້ນປີນີ້ ໄດ້ຂຸດຄົ້ນ ແລະ ປຸງແຕ່ງແຮ່ໄດ້ທັງໝົດ 92.300 ໂຕ່ນ, ເຈາະອຸມົງ 5.202 ແມັດ, ຜະລິດໂລຫະຄຳໄດ້ 358 ກິໂລ ເທົ່າກັບ 60% ຂອງແນການຜະລິດປະຈຳປີ ແຕ່ບໍ່ສາມາດຈຳໜ່າຍຜະລິດຕະພັນໄດ້ ເນື່ອງຈາກໄດ້ຮັບຜົນກະທົບ ຈາກການລະບາດຂອງພະຍາດໂຄວິດ 19, ສ່ວນການຍົກຍ້າຍປະຊາຊົນທີ່ຖືກຜົນກະທົບ ປະຈຸບັນໄດ້ສຳເລັດ ການກໍ່ສ້າງເຮືອນໃຫ້ປະຊາຊົນຈຳນວນ 83 ຄອບຄົວ ແລະໄດ້ຍົກຍ້າຍໄປຢູ່ແລ້ວຈຳນວນໜື່ງ,ໃນບົດລາຍງານໄດ້ຍົກໃຫ້ເຫັນສະພາບປະກົດການຫຍໍ້ທໍໍ້ທີ່ເກີດຂື້ນ ໃນໄລຍະຜ່ານມາ ເປັນຕົ້ນ ການລັກລອບຂຸດຄົ້ນແຮ່ຄຳ ຂອງປະຊາຊົນ ນັບແຕ່ປີ 2015 ເປັນຕົ້ນມາ ສາມາດຈັບກຸມໄດ້ 200 ກວ່າຄົນ ແລະມາຮອດປີ 2020 ເລີ້ມມີການບຸກລຸກຫຼາຍຂື້ນ ເຮັດໃຫ້ມີຄວາມສ່ຽງຕໍ່ຊີວິດ ແລະຊັຍສີນຂອງປະຊາຊົນ, ຕໍ່ບັນຫາທີ່ເກີດຂື້ນທຸກພາກສ່ວນທີ່ກ່ຽວຂ້ອງ ໄດ້ສຸມໃສ່ແກ້ໄຂໃຫ້ມີຄວາມສະຫງົບໂໂດຍພື້ນຖານໃນໄລຍະຜ່ານມາ ແລະຕ້ອງຮ່ວມມືກັນແກ້ໄຂໃຫ້ດີຂື້ນ ໃນຕໍ່ໜ້າ.

ໂອກາດນີ້ ທ່ານຮອງນາຍົກລັດຖະມົນຕີ ໄດ້ຊີ້ນໃຫ້ພາກສ່ວນກ່ຽວຂ້ອງ ແລະບໍໍລິສັດ ຮີບຮ້ອນແກ້ໄຂບັນຫາທີ່ຄົງຄ້າງ ເພື່ອເຮັດໃຫ້ໂຄງການໄດ້ດຳເນີນວຽກງານຕາມແຜນ ທັງຮັບປະກັນບໍ່ໃຫ້ມີຜົນກະທົບຕໍ່ປະຊາຊົນ, ສີ່ງສຳຄັນແມ່ນໃຫ້ປະຊາຊົນທີ່ຢູ່ອ້ອມຮອບເຂດຂຸດຄົ້ນ ມີຊີວິດການເປັນຢູ່ທີ່ດີຂື້ນ. ນອກຈາກຢ້ຽມຢາມເຂດການຂຸດຄົ້ນແຮ່ຄຳ ຂອງບໍລິສັດທຽນຈີນຫົວຄານບໍ່ແຮ່ລາວຈຳກັດແລ້ວ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ລັດຖະມົນຕີກະຊວງແຜນການ ແລະ ການລົງທືນ ພ້ອມດ້ວຍການນຳຂອງແຂວງ ແລະ ກະຊວງກ່ຽວຂ້ອງ ໄດ້ຢ້ຽມຢາມສູນດາຕາເຊັນເຕີ ເຊິ່ງຕັ້ງຢູ່ບ້ານປາກແວດ ເມືອງຊຽງເງີນ ຕື່ມອີກ.

ຫຼວງພະບາງໄດ້ຮັບເງິນຊ່ວຍເຫຼືອ ຈຳນວນ 280 ລ້ານກີບ ຈາກທ່ານຮອງນາຍົກລັດຖະມົນ​ຕີ

0

ຕາມ ວິທະຍຸກະຂາຍສຽນແຫ່ງຊາດ ລາຍງານ: ຮອງນາຍົກລັດຖະມົນຕີ ມອບເງິນ 280 ລ້ານກີບ ໃຫ້ແຂວງຫຼວງພະບາງ ໃນວັນທີ 3 ສິງຫາ 2021, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະ ການລົງທຶນ ໄດ້ມອບເງິນ ຈຳນວນ 280 ລ້ານກີບ ໃຫ້ແຂວງຫຼວງພະບາງ ເພື່ອເປັນທຶນປະກອບສ່ວນນຳໃຊ້ເຂົ້າໃນວຽກງານປ້ອງກັນ ແລະ ຄວບຄຸມ ການແຜ່ລະບາດພະຍາດໂຄວິດ-19 ແລະ ວຽກງທີ່ຈໍາເປັນ ແລະ ຮີບດ່ວນຕ່າງໆ ພາຍໃນແຂວງ.

ເຊິ່ງໃຫ້ກຽດຕາງໜ້າຮັບໂດຍ ທ່ານ ຄຳຂັນ ຈັນທະວີສຸກ ເຈົ້າແຂວງຫຼວງພະບາງ, ເນື່ອງໃນໂອກາດລົງເຄື່ອນໄຫວເຮັດວຽກ ຢູ່ແຂວງດັ່ງກ່າວ ລະຫວ່າງວັນທີ 1-3 ສິງຫາ 2021.

ໂອກາດນີ້, ທ່ານ ຄຳຂັນ ຈັນທະວີສຸກ ໂດຍຕາງໜ້າໃຫ້ອຳນາດການປົກຄອງແຂວຫລວງພະບາງ ໄດ້ສະແດງຄວາມຂອບໃຈໃຈຢ່າງຈິງໃຈ ມາຍັງ ທ່ານຮອງນາຍົກລັດຖະມົນຕີ ທີ່ໄດ້ປະກອບສ່ວນອັນສຳ ຄັນໃນຄັ້ງນີ້ ແລະ ໃຫ້ຄຳໝັ້ນສັນຍາວ່າຈະນຳໃຊ້ເງິນຈຳນວນດັ່ງກ່າວ, ເຂົ້າໃນວຽກງານທີ່ຈຳເປັນໃຫ້ເກີດຜົນປະໂຫຍດສູງສຸດ.

ປິດບ້ານໂນນສຳລານ ເມືອງສອງຄອນ ເນື່ອງຈາກມີຜູ້ຕິດເຊື້ອໂຄວິດ-19

0

ເຈັ້າເມືອງສອງຄອນ ອອກແຈ້ງການ ເລື່ອງເຫັນດີໃຫ້ປິດບ້ານ ຫຼື ລັອກດາວ ບ້ານໂນນສຳລານເມືອງສອງຄອນ ແຂວງສະຫວັນນະເຂດ.

ເຈັ້າເມືອງສອງຄອນ ຂໍຖືເປັນກຽດແຈ້ງໃຫ້ຊາບວ່າ ມີຜູ້ຕິດເຊື້ອໂຄວິດ-19 ໃນຊຸມຊົນໃໝ່ພາຍໃນບ້ານໂນນສຳລານ 03 ກໍລະນີ, ດັ່ງນັ້ນ ຈຶ່ງມີຄວາມສ່ຽງສູງ ໃນການແຜ່ເຊື້ອໂຄວິດ-19.

ເຈົ້າເມືອງສອງຄອນ ຈຶ່ງອອກຄຳສັ່ງດັ່ງນີ້:

ລາຍງານຜູ້ຕິດເຊື້ອພາຍໃນເມືອງ

ແຈ້ງການຂອງ ສນຍ! ສືບຕໍ່ມາດຕະການອີກ 15 ມື້!

ທ່ານ ນ. ທິບພະກອນ ຈັນທະວົງສາ, ຮອງລັດຖະມົນຕີ, ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ຮອງຫົວໜ້າຄະນະສະເພາະກິດ, ຜູ້ປະຈຳການ, ຫົວໜ້າກອງເລຂາກ່ຽວກັບ ການສືບຕໍ່ປະຕິບັດມາດຕະການປ້ອງກັນ, ຄວບຄຸມ ແລະ ສະກັດກັ້ນການລະບາດຂອງພະຍາດ COVID-19 ໃນໄລຍະ ວັນທີ 04-18 ສິງຫາ 2021 (ວັນທີ 03 ສິງຫາ 2021, ທີ່ກະຊວງສາທາລະນະສຸກ)

ອີງຕາມການປະເມີນສະພາບການລະບາດ ແລະ ການຈັດຕັ້ງປະຕິບັດມາດຕະການຕ່າງໆ ໃນຄຳສັ່ງຂອງນາຍົກລັດຖະມົນຕີ ເລກທີ 15/ນຍ, ລົງວັນທີ 21 ເມສາ 2021, ແຈ້ງການ ເລກທີ 829/ຫສນຍ, ລົງວັນທີ 19 ກໍລະກົດ 2021 ແລະ ມາດຕະການຕ່າງໆ ທີ່ໄດ້ວາງອອກ ຂອງຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດ ຂອງພະຍາດ COVID-19 ຂັ້ນສູນກາງ ເຫັນວ່າ ປະເທດພວກເຮົາ ສາມາດຄວບຄຸມການລະບາດໄດ້ໃນລະດັບດີ, ເຮັດໃຫ້ຕົວເລກຜູ້ຕິດເຊື້ອພາຍໃນຊຸມຊົນ ຫຼຸດລົງເປັນສູນໃນບາງໄລຍະ ໂດຍສະເພາະໃນນະຄອນຫຼວງວຽງຈັນ. ແຕ່ເຖິງຢ່າງໃດກໍ່ຕາມ, ເນື່ອງຈາກແຮງງານລາວ ທີ່ຢູ່ປະເທດໃກ້ຄຽງ ກັບຄືນມາ ສປປ ລາວ ນັບມື້ເພີ່ມຂຶ້ນ ເຮັດໃຫ້ຕົວເລກການຕິດເຊື້ອຈາກການນຳເຂົ້າ ໃນທົ່ວປະເທດ ແມ່ນເພີ່ມຂຶ້ນສູງ, ຊຶ່ງບາງວັນມີຫຼາຍກວ່າ 300 ກໍລະນີ ມີທັງສາຍພັນເດວຕາ ແລະ ອານຟາ.

ຍ້ອນສະພາບການລະບາດຢູ່ບັນດາປະເທດໃກ້ຄຽງ ຍັງສືບຕໍ່ຮຸນແຮງ ແລະ ມີຫຼາຍສາຍພັນ ແລະ ແຮງງານລາວທີ່ກັບຄືນປະເທດ ກໍ່ນັບມື້ຫຼາຍຂຶ້ນ ຊຶ່ງໃນນັ້ນຈຳນວນໜຶ່ງ ແມ່ນຕິດເຊື້ອພະຍາດ COVID-19 ໃນສາຍພັນຕ່າງໆ.

ສະນັ້ນ ຈຶ່ງມີຄວາມຈຳເປັນທີ່ພວກເຮົາຕ້ອງກະກຽມຄວາມພ້ອມຮອບດ້ານ ລວມທັງຮອງຮັບໃຫ້ແຮງງານລາວກັບຄືນປະເທດ ທັງໃຫ້ສາມາດຄວບຄຸມການລະບາດຂອງພະຍາດ, ຖ້າບໍ່ດັ່ງນັ້ນຈະມີຄວາມສ່ຽງ ເກີດການລະບາດໃນຊຸມຊົນເປັນວົງກວ້າງ. ນອກນັ້ນ ໃນໄລຍະມໍ່ໆມານີ້ ໄດ້ມີການລັກລອບເປີດກິດຈະການທີ່ຕ້ອງຫ້າມ ຍັງມີກໍລະນີຜູ້ຕິດເຊື້ອ ລັກລອບເຂົ້າເມືອງ ແລະ ແຜ່ເຊື້ອໃນຊຸມຊົນ ຢູ່ບາງທ້ອງຖິ່ນ.

ຕໍ່ໜ້າສະພາບການດັ່ງກ່າວ ລັດຖະບານ ຈຳເປັນຕ້ອງໄດ້ເພີ່ມທະວີຄວາມເຂັ້ມງວດ ໃນການປະຕິບັດບັນດາມາດຕະການ ທີ່ໄດ້ລະບຸໃນຄຳສັ່ງ ເລກທີ 15/ນຍ, ລົງວັນທີ 21 ເມສາ 2021, ແຈ້ງການ ເລກທີ 829/ຫສນຍ, ລົງວັນທີ 19 ກໍລະກົດ 2021 ແລະ ບັນດາຄໍາແນະນໍາຂອງຄະນະສະເພາະກິດຂັ້ນສູນກາງ ສໍາລັບໄລຍະ 15 ວັນຕໍ່ໜ້າ ໂດຍເລີ່ມແຕ່ເວລາ 00:00 ໂມງ ຂອງວັນທີ 04 ຫາ ເວລາ 24:00 ໂມງ ຂອງວັນທີ 18 ສິງຫາ 2021 ດັ່ງນີ້:

ມາດຕະການຫ້າມ ແລະ ຈໍາກັດ:

1. ສືບຕໍ່ເຝົ້າລະວັງຢູ່ບໍລິເວນຊາຍແດນຕ່າງໆ ດ້ວຍການຈັດຕັ້ງກຳລັງລາດຕາເວນ ຢ່າງເປັນປົກກະຕິ, ທັງເພີ່ມຄວາມເຂັ້ມງວດການກວດກາ, ວັດແທກອຸນຫະພູມ ຜູ້ຜ່ານດ່ານຕ່າງໆ ໃຫ້ເຄັ່ງຄັດ ຕິດພັນກັບການຂະຫຍາຍສູນຈຳກັດບໍລິເວນ ກໍ່ຄືສູນປິ່ນປົວ ຢູ່ບາງທ້ອງຖິ່ນ ທີ່ມີແຮງງານລາວ ກັບຄືນປະເທດ ຈຳນວນຫຼາຍ.

2. ສືບຕໍ່ເພີ່ມທະວີການຊອກຫາຜູ້ຕິດເຊື້ອຢູ່ຕາມຊຸມຊົນຕ່າງໆ ມາປິ່ນປົວ ໂດຍມີການສົມທົບ ລະຫວ່າງ ອົງການປົກຄອງທ້ອງຖິ່ນຂັ້ນຕ່າງໆ ກັບ ຂະແໜງສາທາລະນະສຸກ ແລະ ສັງຄົມ ດ້ວຍຫຼາຍວິທີ, ພ້ອມທັງ ເພີ່ມການສັກວັກຊີນ ແກ່ກຸ່ມເປົ້າໝາຍຕ່າງໆ ໃຫ້ໄດ້ຕາມຄາດ ໝາຍ.

3. ສືບຕໍ່ປິດຮ້ານກິນ-ດື່ມ, ຄາຣາໂອເກະ, ສະຖານບັນເທີງ, ໂຮງສາຍຮູບເງົາ, ຮ້ານສະໜຸກເກີ, ຮ້ານສະປາ, ອິນເຕີເນັດຄາເຟ ແລະ ຮ້ານເກມທຸກປະເພດ ໃນທົ່ວປະເທດ.

4. ສືບຕໍ່ຫ້າມຫຼິ້ນກິລາທີ່ຮ່າງກາຍ ມີການສຳພັດກັນ ເຊັ່ນ: ບານເຕະ, ຕີມວຍ ແລະ ອື່ນໆ ຢູ່ແຂວງ ຫຼື ເຂດທີ່ມີການລະບາດໃນຊຸມຊົນ.

5. ສືບຕໍ່ຫ້າມບຸກຄົນເດີນທາງ ເຂົ້າ-ອອກ ເຂດທີ່ມີການຕິດເຊື້ອ (ເຂດແດງ) ຕາມການກໍານົດ ຂອງຄະນະສະເພາະກິດ ຍົກເວັ້ນ ຜູ້ທີ່ໄດ້ຮັບອະນຸຍາດຈາກອົງການປົກຄອງຂັ້ນທີ່ກ່ຽວຂ້ອງ ດ້ວຍເງື່ອນໄຂ ແລະ ເຫດຜົນຈຳເປັນ.

6. ສືບຕໍ່ຫ້າມຈັດງານລ້ຽງສັງສັນ ຫຼື ຊຸມແຊວທຸກຮູບແບບ ຢູ່ທຸກສະຖານທີ່.

7. ສືບຕໍ່ເພີ່ມທະວີຄວາມເຂັ້ມງວດ ໃນການປະຕິບັດບັນດາມາດຕະການ ປ້ອງກັນການຕິດເຊື້ອ ແລະ ແຜ່ເຊື້ອ ດ້ວຍການວັດແທກອຸນຫະພູມ, ຮັກສາໄລຍະຫ່າງ ຢ່າງໜ້ອຍ 01 ແມັດ, ໃສ່ຜ້າອັດປາກ-ດັງ, ລ້າງມືດ້ວຍນໍ້າສະອາດ ໃສ່ສະບູ ຫຼື ເຈວລ້າງມື.

ມາດຕະການສືບຕໍ່ຜ່ອນຜັນ

1. ສືບຕໍ່ອະນຸຍາດໃຫ້ເປີດສູນການຄ້າ, ຮ້ານຂາຍຍົກ-ຂາຍຍ່ອຍ, ຮ້ານຊຸບເປີມາເກັດ, ຮ້ານມິນິມາດ, ຕະຫຼາດສົດ, ຕະຫຼາດຂາຍອາຫານ, ຕະຫຼາດກາງຄືນ ໂດຍໃຫ້ປະຕິບັດມາດຕະການປ້ອງກັນການຕິດເຊື້ອ ແລະ ແຜ່ເຊື້ອ ດ້ວຍການວັດແທກອຸນຫະພູມ, ຮັກສາໄລຍະຫ່າງ ຢ່າງໜ້ອຍ 01 ແມັດ, ໃສ່ຜ້າອັດປາກ-ດັງ, ລ້າງມືດ້ວຍນໍ້າສະອາດ ໃສ່ສະບູ ຫຼື ເຈວລ້າງມື.

2. ສືບຕໍ່ອະນຸຍາດໃຫ້ເປີດຮ້ານຕັດຜົມ ແລະ ຮ້ານເສີມສວຍ ຢູ່ນອກເຂດແດງ ແຕ່ບໍ່ໃຫ້ລູກຄ້າແອອັດຢູ່ໃນຮ້ານ ແລະ ໃຫ້ປະຕິບັດມາດຕະການປ້ອງກັນການຕິດເຊື້ອ ແລະ ແຜ່ເຊື້ອ ຢ່າງເຂັ້ມງວດ.

3. ສືບຕໍ່ອະນຸຍາດໃຫ້ເປີດຮ້ານອາຫານ, ຮ້ານກາເຟ, ສະຖານທີ່ທ່ອງທ່ຽວ ແລະ ສວນອາຫານ ຢູ່ແຂວງທີ່ບໍ່ມີການລະບາດໃນຊຸມຊົນ ໂດຍອະນຸຍາດໃຫ້ນັ່ງກິນ-ດື່ມ ໃນສະຖານທີ່ບໍລິການດັ່ງກ່າວໄດ້, ແຕ່ໃຫ້ຈັດບ່ອນນັ່ງໃຫ້ມີໄລຍະຫ່າງ 01 ແມັດ ຂຶ້ນໄປ ທັງບໍ່ໃຫ້ບໍລິການເຄື່ອງດື່ມທີ່ມີທາດເຫຼົ້າທຸກປະເພດ ຢ່າງເດັດຂາດ ແລະ ປະຕິບັດມາດຕະການປ້ອງກັນການຕິດເຊື້ອ ແລະ ແຜ່ເຊື້ອຢ່າງເຂັ້ມງວດ.

4. ສືບຕໍ່ອະນຸຍາດໃຫ້ຈັດກອງປະຊຸມ ຢູ່ສະຖານທີ່ນອກເຂດແດງ ແຕ່ຕ້ອງປະຕິບັດຕາມມາດຕະການ ຂອງຄະນະສະເພາະກິດ ວາງອອກຢ່າງເຂັ້ມງວດ ເປັນຕົ້ນ ແທກອຸນຫະພູມ, ການຮັກສາໄລຍະຫ່າງ ຢ່າງໜ້ອຍ 01 ແມັດ, ໃສ່ຜ້າອັດປາກ-ດັງ, ລ້າງມືດ້ວຍນໍ້າສະອາດ ໃສ່ສະບູ ຫຼື ເຈວລ້າງມື ຄັກແນ່.

5. ສືບຕໍ່ອະນຸຍາດໃຫ້ນຳໃຊ້ເຮືອຫາປາ ເພື່ອຫາປາຕາມລຳນໍ້າເຂດຊາຍແດນລະຫວ່າງປະເທດ ໃນໄລຍະເວລາ ແຕ່ 06:00 ໂມງ ຫາ 18:00 ໂມງ ໂດຍໃຫ້ອົງການປົກຄອງທ້ອງຖິ່ນ ສົມທົບກັບ ກໍາລັງ ປກຊ-ປກສ ຢູ່ແຕ່ລະພື້ນທີ່ ອອກລະບຽບການຄຸ້ມຄອງ, ກຳນົດຈຳນວນເຮືອຫາປາ ກ່ອນອອກເຄື່ອນໄຫວ ແຕ່ລະມື້ໃຫ້ສ້າງບັນທຶກການປ່ອຍອອກ ແລະ ບັນທຶກການເຂົ້າມາຈອດ, ພ້ອມນັ້ນ ກໍ່ໃຫ້ຕິດຕາມ ກວດກາ ການຈັດຕັ້ງປະຕິບັດ ຢ່າງໃກ້ຊິດ ແລະ ເຂັ້ມງວດ.

6. ສືບຕໍ່ອະນຸຍາດໃຫ້ເດີນທາງເຂົ້າ-ອອກ ຢູ່ພາຍໃນທ້ອງຖິ່ນ ທີ່ບໍ່ມີການລະບາດໃນຊຸມຊົນ ໄດ້ປົກກະຕິ.

7. ສືບຕໍ່ອະນຸຍາດໃຫ້ດຳເນີນການຂົນສົ່ງໂດຍສານທາງບົກ, ທາງນໍ້າ ແລະ ທາງອາກາດ ລະຫວ່າງ ແຂວງຕໍ່ແຂວງທີ່ບໍ່ມີການລະບາດໃນຊຸມຊົນໄດ້ ໂດຍບໍ່ໃຫ້ມີການຈຳກັດບໍລິເວນ; ສຳລັບຄົນຕ່າງປະເທດທີ່ເດີນທາງເຂົ້າ ສປປ ລາວ ມີຈຸດປະສົງເດີນທາງໄປແຂວງອື່ນ ຕ້ອງແຈ້ງໜັງສືເດີນທາງ, ໃບຢັ້ງຢືນການຈຳກັດບໍລິເວນ ຄົບ 14 ວັນ ແລະ ໜັງສືອະນຸຍາດຈາກຄະນະສະເພາະກິດຂັ້ນສູນກາງ ໃຫ້ເຈົ້າໜ້າທີ່ກ່ຽວຂ້ອງ ໂດຍບໍ່ໃຫ້ມີການຈຳກັດບໍລິເວນ ຢູ່ແຂວງປາຍທາງ. ຍົກເວັ້ນຄົນຕ່າງປະເທດທີ່ເຮັດວຽກ ຫຼື ໄດ້ດຳລົງຊີວິດ ຢູ່ ສປປ ລາວ ມາໄລຍະ ໜຶ່ງແລ້ວ ແມ່ນໃຫ້ປະຕິບັດຄືກັນກັບພົນລະເມືອງລາວ.

– ສຳລັບຜູ້ໂດຍສານ ແລະ ຜູ້ຂັບຂີ່ລົດ ເຂົ້າ-ອອກ ແຂວງທີ່ມີການລະບາດໃນຊຸມຊົນ ຕ້ອງແມ່ນຜູ້ທີ່ໄດ້ສັກວັກຊີນ ຄົບໂດສ ໂດຍບໍ່ຕ້ອງຂໍອະນຸຍາດແຂວງປາຍທາງ, ບໍ່ໃຫ້ມີການຈຳກັດບໍລິເວນ ແລະ ຕ້ອງປະຕິບັດຕາມມາດຕະການທີ່ຄະນະສະເພາະກິດ ວາງອອກຢ່າງເຂັ້ມງວດ ເປັນຕົ້ນ ແທກອຸນຫະພູມ, ການຮັກສາໄລຍະຫ່າງ ຢ່າງໜ້ອຍ 01 ແມັດ, ໃສ່ຜ້າອັດປາກ-ດັງ, ລ້າງມືດ້ວຍນໍ້າສະອາດ ໃສ່ສະບູ ຫຼື ເຈວລ້າງມື ຄັກແນ່. ສະເພາະບາງແຂວງ ທີ່ພວມມີການລະບາດໃນຊຸມຊົນ ທັງມີແຮງງານລາວກັບຄືນ ປະເທດ ໃຫ້ອົງການປົກຄອງແຂວງ ອອກມາດຕະການເຂັ້ມງວດ ຕໍ່ການເດີນທາງໄປ-ມາ ພາຍໃນແຂວງ ແລະ ການເຂົ້າ-ອອກ ລະຫວ່າງແຂວງຕົນ ກັບ ແຂວງອື່ນ.

8. ສືບຕໍ່ອະນຸຍາດໃຫ້ຜູ້ຂັບຂີ່ລົດ ແລະ ພະນັກງານຂົນສົ່ງສິນຄ້າ ເຂົ້າ-ອອກ ລະຫວ່າງ ແຂວງ ຫາ ແຂວງ ແລະ ນະຄອນຫຼວງວຽງຈັນ ຫາ ແຂວງ ສາມາດສົ່ງສິນຄ້າ ເຖິງປາຍທາງໄດ້ ໂດຍບໍ່ຈຳເປັນຕ້ອງຄ່ຽນຖ່າຍສິນຄ້າໃນໄລຍະເດີນທາງຢູ່, ບໍ່ຕ້ອງກວດຫາເຊື້ອພະຍາດ COVID-19 ແລະ ບໍ່ຈຳກັດບໍລິເວນ ຢູ່ແຂວງປາຍທາງ ແຕ່ຕ້ອງປະຕິບັດມາດຕະການປ້ອງກັນ ການຕິດເຊື້ອ ແລະ ແຜ່ເຊື້ອທີ່ຄະນະສະເພາະກິດ ວາງອອກ ຢ່າງເຂັ້ມງວດ. ສຳລັບການຂົນສົ່ງສິນຄ້າລະຫວ່າງປະເທດ ໃຫ້ສືບຕໍ່ຈັດຕັ້ງປະຕິບັດ ຕາມທີ່ໄດ້ເຄີຍປະຕິບັດໃນໄລຍະຜ່ານມາ. ໃນພາກປະຕິບັດຕົວຈິງ ໃຫ້ທຸກພາກສ່ວນກ່ຽວຂ້ອງ ປະຕິບັດເປັນເອກະພາບ ຕາມຄຳແນະນຳ ຂອງຄະນະສະເພາະກິດຂັ້ນສູນກາງ ແລະ ຄຳແນະນຳ ຂອງກະຊວງໂຍທາທິການ ແລະ ຂົນສົ່ງ ສະບັບເລກທີ 242/ຍທຂ, ລົງວັນທີ 23 ເມສາ 2021.

9. ໃຫ້ບັນດາກະຊວງ, ອົງການທຽບເທົ່າ, ລວມທັງ ສຳນັກງານ, ວິສາຫະກິດຕ່າງໆ ທົ່ວນະຄອນຫຼວງວຽງຈັນ ພິຈາລະນາໃຫ້ພະນັກງານ, ລັດຖະກອນ, ກຳມະ ກອນຂອງຕົນ ມາປະຈຳການປົກກະຕິ ແຕ່ໃຫ້ມີການວັດແທກອຸນຫະ ພູມ, ມີເຈວລ້າງມືຢູ່ທາງເຂົ້າ, ໃສ່ຜ້າອັດປາກ-ດັງ, ຮັກສາໄລຍະຫ່າງ, ລ້າງມືດ້ວຍ ນໍ້າສະອາດ ໃສ່ສະບູ ຫຼື ເຈວລ້າງມື.

10. ສືບຕໍ່ອະນຸຍາດໃຫ້ເປີດການຮຽນ-ການສອນ ສຳລັບການສຶກສາກ່ອນໄວຮຽນ, ສາມັນສຶກສາ, ອາຊີວະສຶກສາ, ວິທະຍາໄລ ແລະ ການສຶກສາຊັ້ນສູງ ຢູ່ແຂວງທີ່ບໍ່ມີການລະບາດໃນຊຸມຊົນ ໂດຍໄດ້ຮັບອະນຸຍາດຈາກຄະນະສະເພາະກິດຂັ້ນແຂວງ.

11. ສືບຕໍ່ອະນຸຍາດໃຫ້ສູນກິລາໃນຮົ່ມ ແລະ ກາງແຈ້ງທຸກປະເພດ ຢູ່ນະຄອນຫຼວງວຽງຈັນ ແລະ ບັນດາແຂວງທີ່ບໍ່ມີການລະບາດໃນຊຸມຊົນ ເປີດບໍລິການໄດ້ ແຕ່ຕ້ອງແມ່ນສູນກິລາ ທີ່ໄດ້ຮັບອະນຸຍາດຖືກຕ້ອງ ຕາມກົດໝາຍ ແລະ ລະບຽບການກ່ຽວຂ້ອງ, ທັງຫ້າມບໍ່ໃຫ້ບໍລິການເຄື່ອງດື່ມທີ່ມີທາດເຫຼົ້າ ແລະ ໃຫ້ປະຕິບັດຕາມມາດຕະການປ້ອງກັນ ແລະ ຄວບຄຸມການແຜ່ເຊື້ອ ທີ່ຄະນະສະເພາະກິດວາງອອກ ຢ່າງເຂັ້ມງວດ.

12. ສືບຕໍ່ອະນຸຍາດໃຫ້ເປີດຮ້ານນວດ ຢູ່ນະຄອນຫຼວງວຽງຈັນ ແລະ ແຂວງ ທີ່ບໍ່ມີການລະບາດໃນຊຸມຊົນ ໂດຍຜູ້ໃຫ້ບໍລິການ ແລະ ຜູ້ຮັບບໍລິການ ຕ້ອງໄດ້ຮັບວັກຊີນຄົບໂດສ, ໃຫ້ປະຕິບັດມາດຕະການປ້ອງກັນການຕິດເຊື້ອ ແລະ ແຜ່ເຊື້ອ ຢ່າງເຂັ້ມງວດ ແລະ ໃຫ້ປິດບໍລິການ ເວລາ 20:00 ໂມງ.

13. ສືບຕໍ່ອະນຸຍາດໃຫ້ເປີດຊັ້ນຮຽນອາຊີວະສຶກສາ, ການສຶກສາຄູ ແລະ ການສຶກສາຊັ້ນສູງ ທຸກຊັ້ນ ຢູ່ນະຄອນຫຼວງວຽງຈັນ ໂດຍໃຫ້ຈັດຫ້ອງຮຽນແບບຮັກສາໄລຍະຫ່າງ ແລະ ປະຕິບັດບັນດາມາດຕະ ການປ້ອງກັນ ແລະ ຄວບຄຸມ ການແຜ່ລະບາດຂອງພະຍາດ COVID-19 ຢ່າງເຂັ້ມງວດ.

ກ່ຽວກັບການຈຳກັດບໍລິເວນ, ພາຍຫຼັງ ຈຳກັດບໍລິເວນຢູ່ສູນນະຄອນຫຼວງວຽງຈັນ ຫຼື ບັນດາແຂວງ ຄົບ 14 ວັນແລ້ວ ໃຫ້ອົງການປົກຄອງທ້ອງຖິ່ນ ຕິດຕາມການສືບຕໍ່ຈຳກັດບໍລິເວນ ຢູ່ສູນຂອງເມືອງ ຫຼື ບ້ານ ຕື່ມອີກ 14 ວັນ ຢ່າງເຂັ້ມງວດ.

ລັດຖະບານ ສືບຕໍ່ສົ່ງເສີມຄວາມມີນໍ້າໃຈເອື້ອເຟື້ອເພື່ອແຜ່ ຊຶ່ງກັນ ແລະ ກັນ ຂອງຄົນລາວ ທັງຊາດ ລວມທັງ ຂອງຜູ້ປະກອບການທຸລະກິດ ທັງພາຍໃນ ແລະ ຕ່າງປະເທດ ທຸກລະດັບ ໃນການປະກອບສ່ວນເຂົ້າໃນການ ປະຕິບັດນະໂຍບາຍ ແລະ ມາດຕະການຕ່າງໆ ທີ່ລັດຖະບານ ວາງອອກ ດ້ວຍຮູບການຕ່າງໆ ທັງສະຕິປັນຍາ, ວັດຖຸປັດໄຈ, ເຫື່ອແຮງ ແລະ ດຳເນີນ ໄປດ້ວຍຄວາມສະຫງົບ ແລະ ເປັນລະບຽບຮຽບຮ້ອຍ.

ລັດຖະບານ ຮຽກຮ້ອງໃຫ້ພະນັກງານ, ນັກຮົບ, ປະຊາຊົນລາວບັນດາເຜົ່າ, ທຸກຊັ້ນຄົນ ຕະຫຼອດຮອດຊາວຕ່າງປະເທດ ທີ່ພວມປະຕິບັດໜ້າທີ່ຢູ່ ສປປ ລາວ ຈົ່ງຮ່ວມແຮງຮ່ວມໃຈ ປະຕິບັດມາດຕະການທີ່ຄະນະສະເພາະກິດ ວາງອອກຢ່າງເຂັ້ມງວດ, ເປັນຫູເປັນຕາ ຕິດຕາມ ແລະ ລາຍງານ ກໍລະນີພົບເຫັນການລັກລອບເຂົ້າເມືອງ ແລະ ການລະເມີດມາດຕະການຕ່າງໆ ເພື່ອວິທີການແກ້ໄຂ ຢ່າງທັນການ.

ມອບໃຫ້ກະຊວງ, ອົງການທຽບເທົ່າ, ອົງການປົກຄອງທ້ອງຖິ່ນ ແລະ ຄະນະສະເພາະກິດທຸກຂັ້ນ ຜັນຂະຫຍາຍ ແລະ ຈັດຕັ້ງປະຕິບັດແຈ້ງການສະບັບນີ້ ຢ່າງເດັດຂາດ ແລະ ເຂັ້ມງວດ.

ມາດຕະການທີ່ໄດ້ກ່າວມາທັງໝົດນັ້ນ ໄດ້ກຳນົດໃນແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ ເລກທີ 956/ຫສນຍ, ລົງວັນທີ 03 ສິງຫາ 2021 ແລະ ມີຜົນສັກສິດ ນັບແຕ່ວັນທີ 04-18 ສິງຫາ 2021. ພວກເຮົາ ຈະສືບຕໍ່ປະເມີນສະພາບການ, ທົບທວນ ແລະ ດັດປັບມາດຕະການ ໃຫ້ເໝາະສົມກັບສະພາບຕົວຈິງຕື່ມ, ກໍລະນີມີການປ່ຽນແປງ ລັດຖະບານ ຈະແຈ້ງໃຫ້ຊາບເປັນແຕ່ລະໄລຍະ.

ຂໍຮຽກຮ້ອງມາຍັງ ທຸກການຈັດຕັ້ງ, ທຸກອົງການຂອງພັກ, ລັດ, ອົງການ ຈັດຕັ້ງແນວໂຮມ, ອົງການ ຈັດຕັ້ງມະຫາຊົນ ແລະ ການຈັດຕັ້ງທາງສັງຄົມ ເປັນກຳລັງແຮງ ແລະ ສາມັກຄີເປັນຈິດໜຶ່ງໃຈດຽວກັນ ຍົກສູງສະຕິຄວາມຮັບຜິດຊອບ ແລະ ເປັນເຈົ້າການຮ່ວມກັນໃນການປະຕິບັດບັນດາມາດຕະການທີ່ລັດຖະບານ ວາງອອກ ຢ່າງເຂັ້ມງວດ ແລະ ເປັນເອກະພາບ.

ສິ່ງສຳຄັນ, ຂໍໃຫ້ທຸກຄົນ ມີສະຕິໃນການບໍລິໂພກຂໍ້ມູນຂ່າວສານ, ບໍ່ໃຫ້ສົ່ງຕໍ່ຂໍ້ມູນທີ່ບໍ່ມີຄວາມຈິງ ຫຼື ບິດເບືອນຄວາມຈິງ ແລະ ຂໍໃຫ້ຕິດຕາມຂໍ້ມູນຂ່າວສານຈາກແຫຼ່ງຂ່າວທາງການ. ພ້ອມກັນນີ້ ຂໍໃຫ້ທຸກຄົນ ມີຄວາມຮັບຜິດຊອບ ຕໍ່ການປ້ອງກັນຕົນເອງ ແລະ ຄອບຄົວຂອງຕົນ ຕະຫຼອດຮອດຊຸມຊົນທີ່ຕົນເອງດຳລົງຊີວິດຢູ່.
ສຸດທ້າຍນີ້, ຂ້າພະເຈົ້າ ຂໍອວຍພອນໃຫ້ທຸກໆທ່ານຈົ່ງມີສຸຂະພາບແຂງແຮງ, ມີຜົນສໍາເລັດ ໃນໜ້າທີ່ວຽກງານຂອງຕົນ ແລະ ປອດໄພ ຈາກເຊື້ອພະຍາດທຸກຊະນິດ.
ຂໍຂອບໃຈ

ແຈ້ງການທາງການ

.

.

.

.

ດ່ວນ! ປິດຄົນເຂົ້າ-ອອກ ເມືອງພູຄູນ ຊົ່ວຄາວ

0

ຕາມການລາຍງານຂອງ ຂ່າວສານເມືອງພູຄູນ: ເພື່ອປະຕິບັດຕາມຄໍາສັ່ງເລກທີ 15 / ນຍ ແລະ ຄໍາສັ່ງເລກທີ 01 / ຂອງເຈົ້າແຂວງຫຼວງພະບາງ ໃນການຍົກລະດັບ ແລະ ເພີ່ມທະວີມາດຕະການສະກັດກັ້ນ ຄວບຄຸມ ແລະ ກຽມພ້ອມຮອບດ້ານເພື່ອຕ້ານພະຍາດcovid-19 ໃຫ້ເຂັ້ມງວດ ໃນວັນທີ 3 ສິງຫາ 2021 ນີ້ ຄະນະສະເພາະກິດ ຄວບຄຸມແກ້ໄຂຕ້ານການລະບາດຂອງພະຍາດໂຄວິດ-19 ເມືອງພູຄູນ ໄດ້ອອກຄຳສັ່ງເພີ່ມເຕີມ ກ່ຽວກັບການປິດຄົນເຂົ້າ-ອອກເມືອງພູຄູນຊົ່ວຄາວ ຕັ້ງແຕ່ ເວລາ 10 ໂມງ ຂອງວັນທີ 3 ສິງຫາ 2021 ເປັນຕົ້ນໄປ.

ດັ່ງນັ້ນຈຶ່ງແຈ້ງ ໃຫ້ແຕ່ລະບ້ານຕັ້ງດ່ານຈຸດກວດກາຫ້າມຄົນເຂົ້າ-ອອກຢ່າງເດັດຂາດ, ຫ້າມແຕ່ລະຄອບຄົວ ຫ້າມໄປມາຫາສູ່ ຫຼື ເດີນທາງເຂົ້າ-ອອກເມືອງ, ບ້ານຫາບ້ານ.