ກອງປະຊຸມໃຫຍ່ຜູ້ແທນແນວລາວສ້າງຊາດ ທົ່ວປະເທດຄັ້ງທີ XI ໄຂຂຶ້ນຢ່າງເປັນທາງການໃນ ວັນທີ25ພະຈິກ2021 ທີ່ຫໍປະຊຸມແຫ່ງຊາດ, ນະຄອນ ຫລວງວຽງຈັນ ພາຍໃຕ້ການເປັນປະທານຂອງ ທ່ານ ສິນລະວົງ ຄຸດໄພທູນ, ກໍາມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ ໂດຍການໃຫ້ກຽດເຂົ້າຮ່ວມຂອງ ທ່ານ ທອງລຸນ ສີສຸລິດ, ເລຂາທິ ການໃຫຍ່ ຄະນະບໍລິຫານງານສູນກາງພັກ ປະຊາຊົນປະຕິວັດລາວ, ປະທານປະເທດ ແຫ່ງ ສປປ ລາວ.

ກອງປະຊຸມຄັ້ງນີ້ ຈະໄດ້ພ້ອມກັນທົບທວນຄືນຜົນຂອງການຈັດຕັ້ງປະຕິ ບັດມະຕິກອງປະຊຸມໃຫຍ່ ຄັ້ງທີ X ຂອງແນວລາວສ້າງຊາດ ໃນໄລຍະ 5 ປີ ຜ່ານມາ ເພື່ອຍົກໃຫ້ເຫັນຈຸດດີ, ຈຸດອ່ອນ, ຂໍ້ຄົງຄ້າງ ແລະ ບົດຮຽນທີ່ຖອດ ຖອນໄດ້, ພ້ອມທັງກຳນົດຄາດໝາຍລວມ, ເນື້ອໃນການຫັນປ່ຽນ ແລະ ແຜນວຽກຈຸດສຸມໃນ 5 ປີຕໍ່ໜ້າ, ພິຈາລະນາ ແລະ ຮັບຮອງເອົາແຜນພັດ ທະນາອົງການແນວລາວສ້າງຊາດ 5 ປີ (2021-2025), ກົດລະບຽບແນວລາວສ້າງຊາດ ສະໄໝທີ XI ສະບັບປັບປຸງໃໝ່, ຜ່ານບົດສຳຫລວດການນຳ ພາລວມຂອງຄະນະກຳມະການສູນກາງແນວລາວສ້າງຊາດ ສະໄໝທີ X ແລະ ຮັບຮອງເອົາໂຄງປະກອບບຸກຄະລາກອນ ຄະນະກຳມະການສູນກາງແນວລາວສ້າງຊາດ, ທັງຜູ້ປະ ຈຳການ ແລະ ບໍ່ປະຈຳການ ສະໄໝທີ XI.

ນອກຈາກນີ້ ກອງປະຊຸມຍັງຈະໄດ້ຮັບຟັງການໂອ້ລົມຊີ້ນຳຂອງ ທ່ານ ທອງລຸນ ສີສຸລິດ ເລຂາ ທິການໃຫຍ່ ຄະນະບໍລິຫານງານສູນກາງພັກ, ປະທານປະເທດ ແຫ່ງ ສປປ ລາວ ເພື່ອເປັນເຂັມຊີ້ທິດເຍືອງທາງ ໃຫ້ຄະນະກຳມະ ການສູນກາງແນວລາວສ້າງຊາດ ໃນການເສີມຂະຫຍາຍບົດບາດ ແລະ ສ້າງການຫັນປ່ຽນໃໝ່ກ້າວຂຶ້ນຢ່າງບໍ່ຢຸດຢັ້ງ. ໃນໂອກາດຜ່ານບົດລາຍງານການເມືອງຕໍ່ກອງປະຊຸມຄັ້ງນີ້ ທ່ານ ສິນລະວົງ ຄຸດໄພທູນ ໄດ້ຍົກໃຫ້ເຫັນຜົນການຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ X ຂອງແນວລາວສ້າງຊາດ ຕະຫລອດໄລຍະ 5 ປີ ຜ່ານມາ ໄດ້ຮັບຜົນສໍາເລັດໃນຫລາຍດ້ານ ເປັນຕົ້ນ:

ຜົນແຫ່ງການເຕົ້າໂຮມຄວາມສາມັກຄີປອງດອງທົ່ວປວງຊົນ, ການປຸກລະດົມຂົນຂວາຍປະຊາຊົນ, ຊັ້ນຄົນຕ່າງໆ ເຂົ້າຮ່ວມຂະບວນການແຂ່ງຂັນຮັກຊາດ ແລະ ພັດ ທະນາ ໂດຍໄດ້ເປີດຂະບວນການສ້າງຄອບຄົວ ແລະ ບ້ານສາມັກຄີປອງ ດອງທົ່ວປະເທດ ເຮັດໃຫ້ມາຮອດປັດຈຸບັນ ທົ່ວປະເທດສາມາດຮອງຮັບຄອບຄົວສາມັກຄີປອງດອງ ຈໍານວນ 873.875 ຄອບຄົວ, ບ້ານສາມັກຄີປອງດອງ ຈໍານວນ 5.561 ບ້ານ, ດ້ານການເສີມຂະຫຍາຍສິດປະຊາທິປະໄຕຂອງປະຊາຊົນ, ຮັບຟັງຄໍາຄິດຄໍາເຫັນຂອງປະຊາຊົນ, ທັງປົກປັກຮັກສາສິດຜົນປະໂຫຍດອັນຊອບທໍາຂອງປະຊາຊົນ ແລະ ເຮັດວຽກຕິດຕາມກໍາຫາງສຽງ ແລະ ຄໍາສະເໜີຂອງປະຊາຊົນ ເຊີ່ງ 5 ປີ ຜ່ານມາ ໄດ້ຮັບຄໍາຮ້ອງ-ຄໍາສະເໜີ ຈໍານວນ 158 ສະບັບສ່ວນໃຫຍ່ແມ່ນຂໍ້ຂັດແຍ່ງທາງທີ່ດິນ, ການປະ ຕິບັດຄໍາຕັດສິນຂອງສານ ແລະ ອື່ນໆ ໄດ້ຄົ້ນຄ້ວາ ແລະ ໃຫ້ຄໍາເຫັນຕໍ່ພາກ ສ່ວນກ່ຽວຂ້ອງ ຈໍານວນ 108 ສະບັບ, ແຈ້ງຕອບຜູ້ສະເໜີ 18 ສະບັບ ແລະ ກໍາລັງຄົ້ນຄ້ວາ 20 ສະບັບ ແລະ ອື່ນໆ.

ນອກຈາກນີ້ ປະທານສູນກາງແນວລາວສ້າງຊາດ ຍັງໄດ້ຍົກໃຫ້ເຫັນຜົນສໍາເລັດທີ່ຍາດມາໄດ້ໃນດ້ານການພົວພັນ ແລະ ຮ່ວມມືກັບອົງການພາຄີ ແລະ ພາກສ່ວນຕ່າງໆ, ດ້ານວຽກງານການທູດປະຊາຊົນ, ແລະ ການປັບ ປຸງບູລະນະດ້ານການຈັດຕັ້ງ ແລະ ແບບແຜນວິທີເຮັດວຽກຂອງອົງການແນວລາວສ້າງຊາດຂັ້ນຕ່າງໆ, ລວມເຖີງດ້ານຄົງຄ້າງ, ບາງບົດຮຽນທີ່ຖອດ ຖອນໄດ້, ທິດທາງໜ້າທີ່, ຄາດໝາຍ ແລະ ແຜນວຽກຈຸດຂອງຄະນະກໍາມະການແນວລາວສ້າງຊາດ ໄລຍະ 5 ປີ (2021-2026 ) ຕື່ມອີກ.

ສໍາລັບກອງປະຊຸມໃຫຍ່ຜູ້ແທນແນວລາວສ້າງຊາດ ທົ່ວປະເທດຄັ້ງທີ XI ພາຍໃຕ້ຄໍາຂັວນ “ເສີມຂະຫຍາຍມູນເຊື້ອອັນດີງາມຂອງແນວລາວສ້າງຊາດ, ເພີ່ມທະວີຄວາມສາມັກຄີເປັນປຶກແຜ່ນຂອງປວງຊົນລາວທັງຊາດ, ເຕົ້າໂຮມກຳລັງແຮງຂອງປະຊາຊົນທຸກຊັ້ນຄົນ, ປະກອບສ່ວນຢ່າງແຂງ ແຮງເຂົ້າໃນພາລະກິດປົກປັກຮັກສາ-ສ້າງສາປະເທດຊາດ ແລະ ຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກ ໃຫ້ບັນລຸຜົນເປັນຈິງ” ຈະດໍາເນີນຈົນຮອດຕອນເຊົ້າວັນທີ 26 ພະຈິກ 2021 ຈິ່ງຈະສໍາເລັດ.

ຂ່າວ: ມົດແດງນ້ອຍພາບ: ຂປລ

LEAVE A REPLY

Please enter your comment!
Please enter your name here