ຕາມການລາຍງານຂ່າວ ຂອງຄະນະສະເພາະກິດ ປະຈຳວັນທີ 23 ສິງຫາ 2021: ສະພາບການລະບາດພະຍາດໂຄວິດ-19 ຢູ່ ສປປ ລາວ, ມາຮອດວັນທີ 22 ສິງຫາ 2021: ໄດ້ກວດວິເຄາະທັງໝົດ 2,427ຄົນ, ໃນນັ້ນ ກວດພົບຜູ້ຕິດເຊື້ອໃໝ່ ທັງໝົດ152 ຄົນ ເຊິ່ງຕິດເຊື້ອໃນຊຸມຊົນເຖິງ 65 ຄົນ ເປັນຜູ້ສຳຜັດໃກ້ຊິດນຳຜູ້ຕິດເຊື້ອທີ່ຜ່ານມາ ຄື: ສະຫວັນນະເຂດ 43 ຄົນ, ບໍ່ແກ້ວ 18 ຄົນ, ນະຄອນຫຼວງ 3 ຄົນ ແລະ ຫຼວງນ້ຳທາ 1​ ຄົນ.

ສ່ວນ ກໍລະນີນໍາເຂົ້າ ມີ 87 ຄົນ ຈາກ ສະຫວັນນະເຂດ 21 ຄົນ, ຈຳປາສັກ 22 ຄົນ, ນະຄອນຫຼວງ 15 ຄົນ, ຄຳມ່ວນ 25 ຄົນ, ສາລະວັນ 2 ຄົນ, ບໍລິຄຳໄຊ 1 ຄົນ ແລະ ໄຊຍະບູລີ 1 ຄົນ ເຊິ່ງກວດພົບຈາກແຮງງານລາວ ທີ່ກັບມາແຕ່ປະເທດເພື່ອນບ້ານ ເຂົ້າຕາມຈຸດຜ່ານແດນສາກົນ.  

ສຳລັບ ແຂວງສະຫວັນນະເຂດ ທີ່ຕິດເຊື້ອໃນຊຸມຊົນ 43 ຄົນ, ໃນນັ້ນ ຢູ່ສະຖານທີ່ຄຸມຂັງ 34 ຄົນ, ພະນັກງານພະແນກໂຍທາທິການ ແລະ ຂົນສົ່ງ 1 ຄົນ, ຜູ້ສໍາຜັດໃກ້ຊິດກັບຜູ້ທີ່ຕິດເຊື້ອທີ່ຜ່ານມາ 3 ຄົນ (ເຊິ່ງທັງ​ 3 ແມ່ນຖືກຈຳກັດບໍລິເວນຢູ່ສູນແລ້ວ), ພະນັກງານແພດປະຈຳສູນຈຳກັດບໍລິເວນ 1 ຄົນ, ສ່ວນເຫຼືອນັ້ນ ແມ່ນທີມງານກຳລັງລົງເກັບກຳຂໍ້ມູນລາຍລະອຽດ ຈະແຈ້ງໃຫ້ບັນດາທ່ານຊາບຕື່ມໃນພາຍຫຼັງ.

ສຳລັບ ແຂວງ ບໍ່ແກ້ວຕິດເຊື້ອໃນຊຸມຊົນ 18 ຄົນ ແມ່ນມາຈາກບ້ານໃຫຍ່ສີເມືອງງາມ ທັງໝົດ.

ສ່ວນ ແຂວງຫຼວງນ້ຳທາ 1 ຄົນ ເປັນຄົນຈີນ ທີ່ມີປະຫວັດເດີນທາງຈາກ ພະນົມເປັນ, ປະເທດກຳປູເຈຍ ໂດຍຍົນເໝົາລຳ ມານະຄອນຫຼວງວຽງຈັນ (ລະຫວ່າງທາງບໍ່ໄດ້ພັກ), ຫຼັງຈາກນັ້ນ ຕໍ່ລົດໂດຍສານໄປດ່ານບໍ່ເຕັນ, ແຂວງຫຼວງນ້ຳທາ.  

ມາຮອດມື້ນີ້ ພວກເຮົາມີຕົວເລກຜູ້ຕິດເຊື້ອສະສົມທັງໝົດ 12,621 ຄົນ, ຄົນເຈັບເສຍຊີວິດສະສົມ11 ຄົນ (ໃໝ່ 0 ຄົນ) ແລະ ກໍາລັງປິ່ນປົວ ທັງໝົດ 4,305 ຄົນ.

ຜູ້ທີ່ມີຈຸດປະສົງຢາກກວດໂຄວິດ-19  ສຳລັບນະຄອນຫຼວງວຽງຈັນນີ້ ພວກເຮົາຢາກແຈ້ງໃຫ້ບັນດາທ່ານຊາບວ່າ ຈຸດບໍລິການກວດໂຄວິດ-19 ຢູ່ ມສ ສີໂຄດ ມື້ນີ້ຈະເປີດໃຫ້ບໍລິການບັນດາທ່ານເປັນມື້ສຸດທ້າຍ ໃນຕອນເຊົ້າ ເວລາ 9:00-12:00 ໂມງ. ນັບແຕ່ມື້ອື່ນເປັນຕົ້ນໄປຈຸດເກັບຕົວຢ່າງບຶງຂະຫຍອງ ແມ່ນຈະເປີດໃຫ້ບໍລິການບັນດາທ່ານ ໃນຕອນເຊົ້າ ເວລາ 9:00-12:00 ໂມງ.

ສຳລັບແຂວງອື່ນ ແມ່ນທ່ານສາມາດໄປກວດຊອກຫາເຊື້ອໄດ້ຢູ່ໂຮງໝໍແຂວງ ຫຼື ສະຖານທີ່ ທີ່ກຳນົດໄວ້.  

LEAVE A REPLY

Please enter your comment!
Please enter your name here