ຕາມການລາຍງານ CRI FM93 ໃຫ້ຮູ້ເຖິງ: ຄວາມຮູ້ສຶກຂອງນັກກິລາລອຍນໍ້າລາວ ກ່ອນເຂົ້າແຂ່ງຂັນ ໃນງານກິລາໂອແລັມປິກໂຕກຽວ ຕົວແທນນັກກີລາລອຍນໍ້າຂອງ ສປປ ລາວ ທີ່ໄດ້ເຂົ້າຮ່ວມ ໃນງານມະຫາກຳກິລາໂອລິມປິກ 2020 ທີ່ໂຕກຽວ ປະເທດຍີ່ປຸ່ນ, ຄື ນາງ ສີລິອາລຸນ ບຸດຈະເລີນ ແລະ ທ້າວສັນຕິສຸກ ອິນທະວົງ, ກ່ອນຈະລົງແຂ່ງຂັນຕົວຈິງໃນວັນທີ 30 ກໍລະກົດ ໃນໄວໆນີ້ ທັງສອງໄດ້ໃຫ້ສໍາພາດ ແລະ ສະແດງຄວາມຮູ້ສຶກຜ່ານນັກຂ່າວ CRI ດັ່ງນີ້:

ນາງ ສີລິອາລຸນ ບຸດຈະເລີນ ໄດ້ກ່າວວ່າ: ຂ້າພະເຈົ້າຮູ້ສຶກເປັນກຽດ ແລະພາກພູມໃຈຫຼາຍທີ່ຈະໄດ້ເຂົ້າຮ່ວມການແຂ່ງຂັນ ໃນງານມະຫາກຳກິລາໂອແລັມປິກ 2020 ທີ່ໂຕກຽວປະເທດຍີ່ປຸ່ນ ໃນຄັ້ງນີ້ ເຊິ່ງນ້ອງເອງຈະໄດ້ເປັນໜຶ່ງ ໃນບັນດານັກກິລາທີ່ເປັນຕົວແທນໃນນາມທີມຊາດລາວ ແລະ ນ້ອງກໍຈະເຮັດສຸດຄວາມສາມາດເພື່ອໃຫ້ໄດ້ສະຖິຕິທີ່ດີທີ່ສຸດ.

ປະສົບການທີ່ສຳຄັນທີ່ສຸດ ແລະປະທັບໃຈທີ່ສຸດ ກໍຄືການໄດ້ເຂົ້າຮ່ວມມະຫາກຳກິລາໂອລິມປິກທີ່ໂຕກຽວ ແລະລິໂອ້ດິເຈນນິທີ່ຜ່ານມາ ແລະ ປະທັບໃຈທີ່ສຸດແມ່ນໄດ້ເປັນຕົວແທນຂອງປະເທດທີ່ໄດ້ຖືທຸງຊາດໃນຂະບວນພາເລດໃນນາມຕົວແທນຂອງຄະນະນັກກິລາຈາກສປປລາວ. ໃນຄວາມມຸ້ງຫວັງກໍຢາກໄດ້ເຂົ້າຮອບເລິກໆ ແຕ່ເຖິງຢ່າງໃດກະຕາມທຸກຄັ້ງທີ່ເຂົ້າຮ່ວມແມ່ນນ້ອງໄດ້ຕັ້ງໃຈພະຍາຍາມທຳລາຍສະຖິຕິຂອງຕົວເອງທີ່ເຄີຍໄດ້ເຮັດໄວ້ ເພື່ອໃຫ້ໄດ້ສະຖິຕິທີ່ດີທີ່ສຸດ.

ໃນນາມເປັນນັກກິລາທີ່ເປັນຕົວແທນຂອງປະເທດລາວ.ຕົນເອງຂໍແຮງເຊຍ ແລະກຳລັງໃຈຈາກພີ່ນ້ອງຄົນລາວທັງພາຍໃນ ແລະ ຕ່າງປະເທດ ໃຫ້ສົ່ງແຮງໃຈ,ແຮງເຊຍໃຫ້ກັບນັກກິລາຂອງພວກເຮົາດ້ວຍ ນ້ອງຈະຕັ້ງໃຈເຮັດໃຫ້ດີທີ່ສຸດ. ທ້າວ ສັນຕິສຸກ ອິນທະວົງ ກ່າວວ່າ: ຂ້າພະເຈົ້າຮູ້ສືກດີໃຈຫລາຍແລະເປັນກຽດທີ່ໃດ້ເຂົ້າຮ່ວມກິລາໂອແລັມປິກໃນຄັ້ງນີ້. ລາຍການທີ່ນ້ອງປະທັບໃຈທີ່ສຸດແມ່ນເຂົ້າຮ່ວມກິລາໂອແລັມປິກ 2016 ທີ່ປະເທດເບຣຊິນ ເຊິ່ງນ້ອງກໍ່ສາມາດສ້າງສະຖິຕິໃຫ່ມໃຫ້ກັບໂຕເອງ ແລະທັງເປັນການທຳລາຍສະຖິຕິປະເທດລາວໃນຄັ້ງນັ້ນ ເຊິ່ງຕອນນັ້ນນ້ອງມີອາຍຸພຽງແຕ່ 16 ປີ. ເມື່ອນ້ອງໃດ້ມີໂອກາດເຂົ້າຮ່ວມການແຂ່ງຂັນ ແນ່ນອນຢູ່ແລ້ວຕ້ອງມີເປົ້າໝາຍ ແລະຄວາມຫວັງຄື: ສາມາດຜ່ານເຂົ້າໃປໃນຮອບເລິກໆແລະເພື່ອທຳລາຍສະຖິຕິປະເທດລາວອີກຄັ້ງ.

ສຸດທ້າຍນີ້, ຮ່ວມສົ່ງກຳລັງໃຈ ເຊຍນັກກິລາລາວ ທີ່ເຂົ້າຮ່ວມການແຂ່ງຂັນໂອແລັມປິກ 2020 ແນ່ເດີ້! ທັງສອງຈະເຂົ້າແຂ່ງຂັນໃນວັນທີ 30 ກໍລະກົດ 2021 ນີ້.

LEAVE A REPLY

Please enter your comment!
Please enter your name here