ເຈົ້າໜ້າທີ່ ປກສ ສນ 1191 ສະເມິກ ເມືອງ ໄຊທານີ ຢຶດຢາບ້າ ໄດ້ເກືອບ 2 ໂຕນ

ຕາມການລາຍງານ ຂອງ ຄວາມສະຫງົບ Lao Security News ໃຫ້ຮູ້ວ່າ: ໃນວັນທີ 13 ກໍລະກົດ 2021, ເຈົ້າໜ້າທີ່ຕຳຫຼວດປະຈຳ ສະຖານີ 1191 ສະພັງເມິກ ໄດ້ອອກກວດກາລາດຕະເວນຕາມເສັ້ນທາງ 450 ປີ ໄດ້ພົບເຫັນລົດຖືກສົງໄສ ບັນທຸກເປົາສີຟ້າ ຈຳນວນຫຼາຍເປົາ ແລະ ຜູ້ຂັບລົດມີພິລຸດສົງໄສ.

ຈາກນັ້ນ, ເຈົ້າໜ້າທີ່ ຈຶ່ງຂັບລົດໄລ່ຕິດຕາມ ຈົນສາມາດຈັບຄົນຂັບລົດໄດ້ ພ້ອມກວດຄົ້ນເປົ້າໃນລົດພົບເຫັນຢາບ້າ 85 ເປົາ.

ໃນບົດລາຍງານຂອງເຈົ້າໜ້າທີ່ຕຳຫຼວດ ປະຈຳສະຖານີ 1191 ສະພັງເມີກ ເມືອງໄຊທານີ ນະຄອນຫຼວງວຽງຈັນ ໃຫ້ຮູ້ວ່າ: ໃນເວລາປະມານ 10 ໂມງຂອງວັນທີ 13 ກໍລະກົດ ນີ້, ໄດ້ອອກກວດກາລາດຕະເວນຕາມເສັ້ນທາງ 450 ປີ ໄດ້ໄປໂຄ້ງລົດຢູ່ຕໍ່ໜ້າສຸນ ການຄ້າສຸວັນນີ ໄດ້ພົບເຫັນລົດຕ້ອງສົງໄສ ເປັນລົດເຄນ 6 ລໍ້ນ້ອຍ ຂັບຂີ່ມາແຕ່ທາງບ້ານໂຊກ ນ້ອຍ ເມືອງໄຊເສດຖາ ເມື່ອລົດຄັນດັ່ງກ່າວໄດ້ເຫັນສາຍກວດຂອງເຈົ້າໜ້າທີ່ ຈຶ່ງມີທ່າທີ່ຜິດປົກກະຕິ. ດັ່ງນັ້ນ, ເຈົ້າ ໜ້າທີ່ ຈຶ່ງໄດ້ຂັບຂີ່ລົດນຳໄປ ແລະ ຂໍກວດຄົ້ນ. ແຕ່ຄົນຂັບລົດບໍ່ຍອມຈອດ ແລ້ວຂີ່ລົດອອກໄປຢ່າງໄວວາ; ຈາກນັ້ນ, ໄດ້ມີລົດຟໍຈູນເນີ ສີຂາວ ຂີ່ຕາມລົດຄັນດັ່ງກ່າວ ພ້ອມທັງແຊງລົດເຈົ້າໜ້າທີ່ ເພື່ອບໍ່ໃຫ້ລົດເຈົ້າໜ້າທີ່ໄລ່ຕາມລົດເຄນທັນ. ແຕ່ເຈົ້າໜ້າທີ່ ໄດ້ພະຍາຍາມຂີ່ລົດຕິດຕາມ ຈົນຮອດຕໍ່ໜ້າຕະຫຼາດຊຸມຊົນເຂດບ້ານນາແຄ ລົດຟໍຈູນເຈີ ໄດ້ຂີ່ແຊງໜ້າກາຍໄປ ແລະ ລົດເຄນ 6 ລໍ້ ໄດ້ຫຼຸດຜ່ອນຄວາມໄວ ແລ້ວກຳມະກອນຢູ່ຫຼັງລົດເຄນຈຳນວນ 2 ຄົນ ໄດ້ໂຕນໜີ ແລະ ອີກ 2 ຄົນ ຄື: ຄົນຂັບລົດ ແລະ ຜູ້ນັ່ງທາງໜ້າລົດນຳ ກໍກະໂດດລົງຈາກລົດ ເພື່ອເອົາຫຼົບໜີ, ແຕ່ຄົນຂັບລົດໂດດລົງລົດຜິດພາດຕົກລົງກາງທາງ ເຈົ້າໜ້າທີ່ ຈຶ່ງຈັບຕົວໄວ້ໄດ້; ສ່ວນລົດໄດ້ໄຫຼໄປທາງໜ້າປະມານ 50 ແມັດຈຶ່ງຢຸດລົດໄດ້.

ຈາກນັ້ນ, ເຈົ້າໜ້າທີ່ ຈຶ່ງເຂົ້າກວດຄົ້ນລົດຄັນດັ່ງກ່າວ ໝາຍເລກທະບຽນ ບຄ 0614 ສີຟ້າ ໃນລົດບັນທຸກເປົາ ສີຟ້າຈຳນວນ 85 ເປົາ ໃນເປົາໜຶ່ງມີຢາບ້າ ຈຳນວນ 10 ມັດ ເທົ່າກັບ 8.488 ມັດ ເທົ່າກັບ 16.976.000 ເມັດ ນໍ້າໜັກລວມທັງໝົດ 1,953 kg; ຜູ້ຂັບລົດເຄນທີ່ເຈົ້າໜ້າທີ່ຈັບໄດ້ຊື່ ທ້າວ ເນັງຊົ່ງ. ປັດຈຸບັນ, ເຈົ້າໜ້າທີ່ ໄດ້ນຳຕົວຜູ້ກ່ຽວ ໄປດຳເນີນການສອບສວນຂະຫຍາຍຜົນ, ສ່ວນຜູ້ທີ່ເອົາຕົວຫຼົບໜີນັ້ນ, ເຈົ້າໜ້າທີ່ ກຳລັງຕິດຕາມນຳຈັບຕົວມາດຳເນີນຄະດີ.

LEAVE A REPLY

Please enter your comment!
Please enter your name here