ຄະນະກຳມະທິການປ້ອງກັນສະກັດກັ້ນໂຄວິ-19 ເມືອງໂພນໂຮງ ຂໍຖືເປັນກຽດແຈ້ງການ ມາຍັງທ່ານຊາບວ່າ ປັດຈຸບັນນີ້, ສະພາບການແຜ່ລະບາດ ຂອງພະຍາດໂຄວິກ-19 ຍັງສືບຕໍ່ແຜ່ລະບາດຢູ່ເມືອງໂພນໂຮງ ສະນັ້ນ, ເພື່ອເປັນການສະກັດກັ້ນ, ປ້ອງກັນ, ຄວບຄຸມ ແລະ ແກ້ໄຂການແຜ່ລະບາດ ຂອງພະຍາດດັ່ງກ່າວ ຈຶ່ງອອກແຈ້ງການມາຍັງທ່ານເພື່ອສືບຕໍ່ ຈັດຕັ້ງປະຕິບັດມາດຄະການດັ່ງນີ້:

1. ສຶບຕໍ່ເພີ່ມທະວີການໂຄສະນາ,ສຸຂະສຶກສາ ແລະ ເປັນເຈົ້າການປະຕິບັດມາດຕະການປ້ອງກັນເຊື້ອ ພະຍາດໂຄວິດ-19.

2. ສຶບຕໍ່ປິດກິດຈະການຮ້ານບັນເທິງ, ຮ້ານຄາລາໂອເກະ, ຮ້ານກິນດື່ມ, ຮ້ານອາຫານບຸບເຟ້ທຸກປະເພດ, ຮ້ານ ອີນເຕີເນັດຄ່າເຟ້, ຮ້ານເກມ, ຮ້ານນວດ-ສະປາ, ຮ້ານຮົມຢາພື້ນເມືອງ, ຮ້ານສະນຸກເກີ, ສັ່ງວຽນຕີໄກ່, ສູນກິລາ ໃນຮົ່ມ, ຫ້າມຈັດກິດຈະກໍາເຕະບານ, ຕີມວຍ ແລະ ອື່ນໆ.

3. ໃຫ້ກອງບັນຊາການ ປກສ ເມືອງ ປິດບໍລິການເອກະສານຊົ່ວຄາວ ຈົນກວ່າຈະມີຄໍາສັ່ງໃຫ້ສືບຕໍ່ຈື່ງຈັດຕັ້ງປະຕິບັດ.

4. ຫ້າມບໍ່ໃຫ້ບ້ານຮັບເອົາພົນລະເມືອງ ທີ່ໂຍກຍ້າຍມາແຕ່ຈຸດອື່ນ ທີ່ມີການແຜ່ລະບາດ ຂອງພະຍາດໂຄວິດ-19 ຫຼື ມາຈາກຈຸດທີ່ມີຄວາມສ່ຽງ ຍົກເວັ້ນ ກໍລະນີເຈັບເປັນ ແລະ ຕ້ອງໄດ້ຮັບການສັກຢາຄົບສອງເຂັມ ມີໃບເດີນທາງ ຈາກຄະນະສະເພາະກິດບ່ອນທີ່ຜູ້ຈະມາອອກໃຫ້ຈື່ງອານຸຍາດໃຫ້ມາໄດ້.

5. ສືບຕໍ່ປິດບັນດາໂຮງຈັກ,ໂຮງງານ, ຫົວໜ່ວຍຫັດຖະກຳທີ່ຢູ່ໃນຂອບເຂດ ຫຼື ກຳນົດ ເປັນບ້ານແດງ ຍົກເວັ້ນ ໂຮງຈັກ, ໂຮງງານ ທີ່ມີຫໍພັກພະນັກງານປະຈຳ ແລະ ພະນັກງານໄດ້ສັກຢາວັກຊີນຄົບທັງສອງເຂັມແລ້ວ.

6. ສືບຕໍ່ຫ້າມປະຊາຊົນ ຫຼື ບຸກຄົນເດີນທາງເຂົ້າ-ອອກ ທ້ອງຖິ່ນ ຫຼື ເຂດທີ່ມີການຕິດເຊື້ອຢ່າງເດັດຂາດ

7. ຫ້າມຈັດງານລ້ຽງສ້າງສັນ, ມົ້ວສຸມ ( ເຫຼົ້າ-ເບຍ) ທຸກຮູບແບບໃນທຸກສະຖານທີ່

8. ກຳນົດບ້ານໃໝ່ ແລະ ເປັນບ້ານແດງ (ບ້ານທີ່ມີການລະບາດຂອງເຊື້ອພະຍາດໂຄວິດ-19), ພ້ອມນີ້ໃຫ້ຢຸດເຊົາກິດຈະການຊົ່ວຄາວ ຂອງຫົວໜ່ວຍກິດຈະການທຸກໆກິດຈະການຢູ່ພາຍໃນບ້ານ. ຢູ່ບ້ານອື່ນໆໃຫ້ເອົາໃຈໃສ່ ແລະ ເປັນເຈົ້າການໃນການຕິດຕາມຄົນເຂົ້າ-ອອກ ແລະປະຕິບັດມາດຕະການຕາມຄຳສັ່ງຂອງຂັ້ນເທີງຢ່າງເຂັ້ມງວດ. ມີການລາຍງານຢ່າງເປັນປົກກະຕິ.

9.ໃຫ້ຄະນະກຳມະການປ້ອງກັນ, ສະກັດກັ້ນພະຍາດໂຄວິດ-19 ເມືອງໂພນໂຮງ ປະສານສົມທົບກັບຄະນະຮັບຜິດຊອບກຸ່ມບ້ານ ປກສ ກຸ່ມບ້ານ ກວດກາຢ່າງເປັນປົກກະຕິ

10. ມອບໃຫ້ຄະນະສະເພາະກິດວຽກງານ ໂຄວິດເມືອງໂພນໂຮງ, ຂະແໜງການກ່ຽວຂ້ອງ, ກຸ່ມບ້ານ, ອົງການປົກຄອງບ້ານ ແລະ ພາກສ່ວນ ທີ່ກ່ຽວຂ້ອງເປັນເຈົ້າການຈັດຕັ້ງປະຕິບັດຕາມແຈ້ງການສະບັບນີ້ຢ່າງເຂັ້ມງວດ ແລະ ເລີ່ມຈັດຕັ້ງປະຕິບັດນັບແຕ່ມື້ລົງລາຍເຊັນນີ້ເປັນຕົ້ນໄປ ຈົນເຖິງ ວັນທີ 4/7/2021.

LEAVE A REPLY

Please enter your comment!
Please enter your name here